仲記唔記得那些年，我哋一齊讀書嘅日子？學生嘅年代無憂無慮，除咗讀書，我哋做過好多自認為驚天動地嘅事，例如挑戰校規，將校裙攝到啱啱好及膝，訓導主任一走，我哋又攝高一吋，因為過膝校裙太「娘」太核突；我哋用塗改液喺書枱玩井字過三關，同桌係我哋嘅最佳對手（其實係最就手嘅對手）；鍾意偷偷偷地喺上堂睇漫畫書，有時忍唔住笑出嚟，老師發現之後罰面壁，但諗起漫畫內容都係忍唔住笑；女仔好多時鍾意畫書，但唔係間重點，而係喺書入面畫一個好似阿拉伯數字「4」嘅傘形圖，然後喺「傘下」寫上心儀對象同自己個名，傻豬豬以為就可以同對方永遠喺埋一齊... ...呢啲時光，你又經歷幾多？或者好Old School，但每次諗番都好值得我哋回味，一點一滴都好似尋日先發生... ... 上個星期日小妹同朋友發掘到觀塘有間以校園為主題嘅Café，雖然地段有啲偏遠，但久違校園生活嘅我哋都躍躍欲試。位於觀塘興業街嘅「小時光」，就係希望帶食客回到小時候同讀書嘅日子，所以店內不乏懷舊傢俬同擺設，舊式電視、陳年書櫃、鐵框座地風扇、被棄置嘅國小原木書枱同櫈... ...全部都充滿歲月痕跡。 舊式電視、陳年書櫃、鐵框座地風扇、被棄置嘅國小原木書枱同櫈... ...全部都充滿歲月痕跡。 呢個位係咪訓導主任罰人嘅位嚟架？ 有好多舊玩具，記得以前自己都有幾個係咁架！ 啲機械人可能男仔會有共嗚啲！ 連環境都咁Vintage，好適合文青打躉 喺呢度食嘢係自助形式，只要揀好食物就可以到櫃台購買，非常自由同隨性，當然食物都充滿台灣古早味，只要你講得出嘅台式食物同飲品，都可以喺度搵到，小妹當然唔會錯過最愛嘅「台式養生藥膳排骨湯飯」啦！要知道呢味餸唔係間間台式食店都有得食，要做到好食就更加難！個人覺得呢度嘅藥燉排骨味道偏淡，藥材味道唔太濃，或者想就番香港人口味啦！皆因只要去過台灣嘅人都知道，藥燉排骨味道偏濃，唔係太多人接受，但小妹偏好菜餚，所以覺得不過不失！ 台式養生藥膳排骨湯飯（$60） 相反，香酥雞塊就較出色，同台灣著名連鎖店「豪大大」一樣，用直徑長達17cm嘅巴西雞扒放入滾油生炸，輕易鎖住鮮嫩肉汁，食落香脆鬆化又唔會太油膩，面頭嘅七味粉充滿辣勁，味道一啲都唔輸畀「豪大大」！ 香酥雞塊（$30） 不過個「滷雞轉彎」起初真係考起我，究竟佢係雞嘅咩部位？咩部位犀利到識轉彎？「七里香」就話係雞Pat Pat，咁「轉彎」係... ...嗱！大家咪諗邪嘢呀！其實「轉彎」係指雞翼，原因係咩我冇問老闆，總之好多台灣人會咁叫佢，如果大家知道，就麻煩話畀小妹知，等小妹學多吓嘢。滷味可以話係台灣必食小吃，而呢度嘅雞翼亦經過精心炮製，老闆以自家調配嘅滷水將雞翼至少滷兩日，等雞翼變深色同入味就可以見人，經過秘製滷水滷過嘅雞翼軟腍滑溜，入口即化但又食到絲絲雞肉纖維，再配合香濃滷水汁，呢個就係台灣嘅味道！而佢附送嘅滷水蘿蔔更加精彩，感覺就同牛腩燜蘿蔔一樣，如果你食過，你會明我講咩！ 滷雞轉彎（$25） 飲品方面都似足學校，當然唔係咸豐年代嘅鐵水杯啦！而係用Science堂用嘅量杯同三角錐瓶！呢個抹茶紅豆雖然同一般台式飲品店賣嘅味道大同小異，但用量杯做杯，三角錐瓶做盛載器皿就玩味十足，要知道，喺讀書嘅年代，我哋打爛過幾多隻呢啲量杯？所以小妹飲起上嚟都特別小心，費事歷史重演！ 抹茶紅豆（$30） 水果茶（$45） 嗌晒成枱嘢都幾壯觀！不過味道好「媽媽」，感覺好似似食緊台灣媽媽煮嘅餸菜。 店內有好多漫畫，客人可以「光明正大」咁睇，唔使再避訓導主任！ 椅背印有國小名稱 桌面上亦有好多曾用過呢張枱嘅學生遺下嘅感言，八卦如我當然要偷睇吓同學仔嘅青春歲月！ 室內有一部舊式鋼琴，聽聞仲彈到，如果你識彈都唔好獻醜，因為整壞咗佢就只會係擺設，要知道我們都是愛護舊物的！ 其實輔導室入面係自修室^^ 講明係學校，當然有訓導室，台灣叫「輔導」相對嚟得溫柔，難怪喺台式教育下嘅男仔講嘢特別溫柔，打動唔少香港少女嘅心！啲台劇男主角個個柔情似水，香港男仔睇怕都要學吓嘢！ 另外，仲有治療室（即醫療室），香港嘅學校好似冇呢樣嘢。 得女神Kay同Juno首合唱歌《羅生門》有句歌詞：「那動人時光，不用常回看。」小妹就唔同意，既然係一段美好時光，何不好好懷愐？生活太苦悶，日復日嘅工作令我哋透唔到氣，如果每個月或者每個星期抽一日整理一下思緒，愐懷一下讀書時期嘅日子，回憶吓初戀，又或諗吓陪你度過學生歲月嘅死黨，一切都會令你感覺人生真係好有趣，今日嘅失意將成為昨日嘅歷史，深呼吸一口氣，生活繼續如常！當然，歌詞講嘅係一個女仔難頂癡情男子嘅苦苦追求，咁又另當別論！ ～～後記～～ 小妹發現呢度影黑白相幾有味道，大家都可以試吓玩^^點擊圖片放大 +3 店名：小時光 地址：觀塘興業街18號美興工業大廈A座1樓C室 電話：3188 2380 營業時間：星期一: 12:00-18:00、星期二至日: 12:00-21:30
