近年韓風吹得正盛,幾乎每條街、每個商場都總有一間韓式餐館在左近,密集程度拍得住便利店,炸雞店、部隊鍋店、烤肉專門店、醬蟹店、傳統韓式家庭小食店... ...總之你喺韓國試過同見過嘅通通都有,但係食得多都總有悶嘅一刻,畢竟菜式做法太單一,萬變不離其中! 小妹近日積極搜尋創新韓菜,發現呢間位於尖沙咀海港城入面嘅THE JOOMAK令人驚喜,皆因佢除咗提供一般嘅韓食之外,仲積極求變,將傳統韓菜結合中、西、日特色,打造出不一樣的韓國菜!其實THE JOOMAK嘅總店設喺韓國江南嘅中心地帶,早已風摩當地,主理人Steve自小喺美國接受教育,更曾經喺意大利、中國同澳洲等地從事餐飲工作,所以佢希望將傳統韓食作一個大變奏,打造出新派韓菜。 韓式牛肉漢堡 班尼迪蛋晶瑩通透,好想一啖咬落去呀! 清楚見到5層!!!! 咬開之後蛋漿流瀉 小妹既然同得幾個朋友食飯,當然想試多幾款,嗌齊中、西、日、韓Crossover,實行歎盡所有韓式Fusion菜!首先上枱嘅係韓式牛肉漢堡,唔使講都知道呢款菜式係韓加西式嘅組合,咪睇個漢堡細細個,材料多到爆晒出嚟!店舖選用相等於日本A5和牛嘅1++級別韓牛,先將經秘製醬汁醃製嘅韓牛快炒,然後加入紅椒、洋蔥等增加香味同口感,然後將班尼迪蛋、芝士、蕃茄、沙津菜連韓牛排放入特製嘅麵包中間,一啖咬落去,柔軟嫩滑嘅班尼迪蛋漿、Juicy嘅牛排、香濃嘅芝士、爽脆嘅蕃茄同沙津菜,5種層次喺口入面同時爆發,So Crazy!不過小妹食得比較「呢Hea」,啲蛋漿流到成手都係,有啲失禮!跟餐仲有薯條同泡菜,原來西式同韓式都可以咁夾! 脆米牛肉球 食完西式,當然唔可以放過中式!呢個脆米牛肉球自然令人諗起廣東點心,將經滾油炸過嘅脆米,包裹住經調味嘅免治韓牛肉,再放入蒸籠蒸,食嘅時候外脆內軟,層次分明。用韓牛做點心,相信唔係太多茶樓夠膽做,皆因時間拿捏得宜係重點,蒸過龍,牛肉會變乾同老,脆米亦會變腍;太快起蓋,牛肉會過生,脆米會過硬,所以背後功夫絕對唔少得! 烤韓牛 1++嘅韓牛脂肪比例勻稱,燒起上嚟油香四溢,食落甘香豐腴。 即場有Oppa幫你搭爐,好體貼呀^^ 用芝麻葉包住食最地道 如果覺得未夠喉,都可以試吓烤韓牛,烤爐同我哋一般喺烤肉店見嘅鐵網式好唔同,但就同日式嘅類近,由於係一人燒,所以份量上都係以一人份量為主。店舖同樣選用1++嘅韓牛,脂肪比例勻稱,燒起上嚟油香四溢,食落甘香豐腴,難怪係韓國最頂級嘅食材!店舖通常唔會主動提供醬料,皆因要食到「真.韓牛」嘅滋味就一定唔可以用其他「妖邪之味」,因為食原汁原味嘅韓牛先係王道! 韓式下午茶 烤雞漢堡 店舖仲特別推出韓式下午茶Tea Set,平時食開精緻甜品Afternoon Tea嘅絲打一定好難想像優雅咁歎韓式,但其實店舖都幾有創意,有齊韓國特色小食,份量適中之餘又可以試晒幾款小食,好似烤雞漢堡(小妹私心覺得唔夠韓牛漢堡好食)、麻藥炸雞、韓式牛肉卷同柚子雜菜沙律。 麻藥炸雞係選用90日嘅雞隻,由韓國總廚以特製方式醃製,之後放入炸爐,最後配上特製嘅芝士粉同糖粉,食落香脆可口,係店內嘅大熱之選,放入Tea Set中自然不為過! 麻藥炸雞 而柚子雜菜沙律就以新鮮蔬菜製作,加上特製柚子汁,爽口開胃! 柚子雜菜沙律 至於韓式牛肉卷就用咗新鮮青瓜條、蘿蔔條、醃蘿蔔同秘製牛肉入饌,配上珍珠米,口感清新豐富。 韓式牛肉卷 士多啤梨馬格利酒,甜甜哋超易入口,就算唔多飲酒嘅女仔都可以試吓。 士多啤梨馬格利酒 飽餐一頓,甜品就要上場,呢個香蕉布甸罐嘅Custard係自家製嘅,每層Custard都夾住用威化餅打成嘅木糠,同澳門嘅木糠布甸大同小異,面層配上新鮮香蕉,食落幼滑,「蕉」味十足! 香蕉布甸罐 小妹覺得可以喺傳統韓菜上面加入一啲新嘅元素,同時又唔會覺得格格不入,認真唔容易!能夠將中、西、日、韓相互融合,玩吓創意,係韓式飲食界嘅一大革新!點擊圖片放大 +2 店名:THE JOOMAK 電話:2111 0851 地址:尖沙咀廣東道17號海港城海運大廈3樓LCX 34號舖 營業時間:星期一至日 12:00-22:30