聞說韓國楓葉美不勝收，一直想一睹紅葉「楓」采嘅我當然好想睇吓滿山火樹嘅壯麗景觀！其實去韓國睇楓葉最應該去全羅道、江原道、京畿道等比較近郊嘅地區，只可惜小妹唔想放棄「濕平」嘅機會，所以唯有Stay喺首爾賞楓，千祈唔好以為首爾嘅楓葉有欠睇頭，其實如果識得搵紅楓盛放嘅地方，一樣可以影到靚紅葉！！ 景福宮 其實去景福宮賞楓唔需要入去睇，門外有幾棵楓葉都好正架！而且仲係全部都紅晒！其實宮入面都有紅楓，只係比較稀疏，同宮外嘅數量差唔多，如果一心只係想睇紅葉，點解要嘥3000won入去睇呢？宮外一樣精彩！同場仲有銀杏加映放送添！！點擊圖片放大 +8 同場加映---銀杏樹 昌德宮秘院 小妹第一次去韓國嘅時候參加咗參觀昌德宮秘院嘅Tour，導遊小姐Show咗幾張秘院一年四季嘅相畀我睇，嗰張布滿紅楓嘅相令我一見難忘。雖然小妹今趟旅程對於賞楓嚟講係疑似早咗，而秘院嘅紅葉亦冇當時相中嘅茂密，但係行幾步就有幾棵紅楓，影起相上嚟都好靚架！點擊圖片放大 +14 有啲品種係黃色架！好特別呀！！！ 梨花女子大學 作為韓國首爾歷史最悠久大學之一嘅梨大，唔單止以靚人見稱（韓國第一間女子大學，韓國靚女集中地），學校四周亦種滿紅楓，每逢入秋都吸引唔少人嚟賞楓，而小妹當然都唔會放過呢個機會啦！楓葉多數分布喺學校嘅散步小徑同教堂附近，雖然話就話唔再畀遊客進入學校範圍，但係紅楓嘅位置咁隱閉，再加上扮學生行過，話之你喪影成日都唔會有人發現啦！ 點擊圖片放大 +9 梨大附近嘅馬路兩邊都有銀杏樹！！！ 其實今年嘅紅葉嚟得比較遲，過往10月中已經開始楓葉泛紅，但今年10月底都未完全泛紅，係有少少失望，不過可以睇到部分紅楓已經好開心喇！！！各位如果係嚟緊11月中開始出發去首爾，可能會睇到更靚更多嘅紅葉架！所以千祈唔好放棄以上地點喇！！！
