自元朗YOHO Mall開幕之後，迅即引起一班食客關注，皆因呢個大型購物商場匯聚咗中、西、日、韓、台、泰、越等美食，可以話係選擇多元化，啱晒一班搵食飯團！ 呢間位於YOHO Mall入面嘅餐廳，主打歐美菜式，小妹見佢晏晝推出「超值Set Lunch」，而且菜式都幾吸引，於是就揀佢做午餐落腳點。店舖設計以工業風為主，灰色嘅水泥牆畀人一種沉靜冰冷嘅感覺，配合一牆彩色廣告畫，老舊得嚟又摩登！天花上裸露嘅水管盡顯粗獷一面，金屬製嘅櫈同原木餐枱，令成間餐廳充滿韻味同質感！餐廳內有一面面向商場園林景緻嘅落地大玻璃，自然採光將陽光引進室內，令客人可以邊欣賞窗外綠意邊品嚐美酒佳餚。酒吧區長期有調酒師駐場，等你可以隨時嗌一杯小酌，酒櫃上放滿各種紅、白酒，整齊有緻，極具時尚！ 酒吧區以一支支紅、白酒排成一面牆，天花上嘅裸露水管型格得嚟又充滿格調！ 灰色水泥牆、金屬櫈同原木餐枱係工業風必備元素！ 水泥牆上掛滿色彩繽紛嘅廣告畫，極具時尚。 餐廳內嘅落地大玻璃將陽光引進室內，配合窗外園林景緻，舒適又自在！ Lunch Set嘅價錢由$78至$188不等，包括頭盤（沙律或餐湯）、主菜、甜品、茶或咖啡，小妹同好友一人嗌咗一個Lunch Set Share，希望試吓唔同嘢。 頭盤——意大利雜菜湯 鮮茄忌廉意大利飯配香辣雞胸肉 $98 鮮茄忌廉意大利飯配香辣雞胸肉，混合咗忌廉嘅茄汁香滑濃郁，每粒飯都被汁醬包裹住，飯粒咬起嚟軟硬適中，配合微辣嘅雞胸肉條，雖然味道偏鹹，但都幾惹味！ 美式貴族早餐 $78 美式貴族早餐，即係All Day Breakfast，有豬肉腸、煙肉、焗豆、炒磨菇同烤蕃茄，每個Item都只用海鹽稍作吊味，帶出食物最基本味道，不過份量稍細，對於一個女仔嚟講當然係啱啱好，但對於男仔嚟講可能未必夠飽，有啲唔抵！ 甜品——奶油蛋糕（前）、朱古力慕絲 餐廳設有康樂區，門口嘅飛鏢區同落地玻璃前嘅桌球區都可供食客大展身手兼Relax一吓，可見餐廳喺設計上都花咗唔少心思！個人覺得餐廳嘅設計同裝潢比食物嚟得吸引，就算唔係嚟食嘢，嗌一杯咖啡倚窗曬太陽，又或Order一杯紅酒同三五知己打吓桌球、掟吓飛鏢，都係一個唔錯嘅地方！ 門口設有飛鏢區 桌球區 店名：The Sky Bar 電話：2885 2822 地址：元朗元龍街9號形點一期地下G007號舖 營業時間：星期一至五：12:00-00:00、星期六：12:00-01:00、星期日：12:00-00:00、公眾假期：12:00-01:00
