話說自Vivienne Westwood喺上海K11開咗首間Cafe之後，一眾熱愛時尚之人都紛紛到上海朝聖，小妹冇假期去上海，惟有得個望字，揭吓雜誌望梅止渴！等咗半年，第二間分店竟然登陸香港，仲要開喺成日去嘅尖沙咀，仲要開正海運大廈嘅Vivienne Westwood分店隔離，點會唔令一眾香港潮人瘋狂朝聖？ 小妹無趕住湊熱鬧，諗住隔個零星期先去試，點知都係咁多人，加上去嗰日又係星期六，我足足等咗兩個半鐘，估唔到要見西太后難，要食西太后個Tea更難上加難！舖面唔大，只可以容納大概8張枱，要等係好自然嘅事，不過小妹對於食嘢好有耐性，等幾耐都冇問題！ 好多人排緊隊呀！你見我企到咁後就知好多人等緊啦！ 據聞香港分店嘅設計同上海分店大致相同，都係分「攝影棚」同「茶室」兩個主題。「攝影棚」係模仿花生騷後台Model嘅拍照區，純白色嘅牆壁，金色嘅品牌Logo，絕對係集郵熱點！至於另一邊嘅「茶室」，主要以歐洲宮廷壁紙打造，懷舊得嚟又帶啲奢華，坐喺呢邊歎下午茶，恍如置身英式宮廷之中！個人覺得，鍾意浮誇同突出嘅朋友可以揀「攝影棚」集郵；至於行高貴優雅路線嘅呢，就可以揀「茶室」主題影相，總之可以滿足唔同人嘅需要啦！ 門口左手邊係「攝影棚」，模仿花生騷後台Model嘅拍照區，大家可以扮吓Model過去影張相架！ Counter位置成面牆都係Vivienne Westwood招牌格仔圖案嘅茶葉罐，見到都尖叫呀！ 木製嘅圓枱同櫈，既懷舊又古樸。 Café 完全將把品牌嘅標誌融入餐具、食物同布置之中，完全將品牌嘅特色發揮到一個極致！茶壺、茶杯、碟、三層架、銀餐具上都有Vivienne Westwood嘅招牌土星Logo同經典格仔圖案，簡直令小妹陷入瘋狂狀態，未食個Tea已經揸住相機起勢狂影！就連金色三層架上嘅蛋糕同三層架頂部都有土星Logo，食埋Fashion落肚，仲唔潮到爆？成個Afternoon Tea Set盛惠$438兩位，有手工蛋糕、三文治、麵包、英式鬆餅同手工雪糕，以種類嚟講都算多，兩個女仔食絕對綽綽有餘！店內亦會售賣英式口味嘅蛋糕，如果唔想等太耐可以買外賣，不過會爭啲Feel囉！ 餐具上面都有品牌Logo同招牌格仔圖案，滿足一眾港女嘅虛榮心！ 點擊圖片放大 頂層——荔枝玫瑰慕絲綠茶朱古力忌廉蛋糕 中層——迷你經典栗子撻、香濃朱古力撻 下層——吞拿魚醬三文治、芝士火腿三文治、煙三文魚忌廉芝士手工麵包、傳統英式鬆餅及提子鬆餅 英式手工雪糕後：黑朱古力（偏苦）左：伯爵茶（充滿伯爵荼香）右：雲尼拿（奶味香濃）前：開心果（味道最獨特，最值得一試） 如果唔想等，大家都可以外賣拎走慢慢歎！ 呢個以英國國旗作為設計概念嘅蛋糕（Union Jack $650 / 7吋），用紅桑子乾同藍莓乾砌成英國國旗Logo，夠晒標誌性，有冇人買個氹吓我？ 其實，Vivienne Westwood Café香港分店好夠Gimmick，除咗係品牌嘅名之外，佢喺上海登陸已經備受各地傳媒關注，不過小妹覺得啱啱開張嘅佢仍然略有不足，可以再進步！ 首先係位置，其實佢選址尖沙咀呢個購物中心係明智之舉，一嚟遊客多，二嚟又喺間品牌舖頭隔離，買買吓嘢想歎個Tea絕對冇難度，不過佢開喺又窄又多人嘅購物廊就有啲麻煩，因為商場保安唔止一次要求排隊嘅客人企入啲，唔好阻住其他人行，但係排隊嘅人又真係咁多，企都冇掟企，有啲尷尬囉！建議不如試吓用電話Book枱或網上預約，又或者派籌，減少等候時間之餘，Walk-in嘅人可以周圍行吓，唔使白白喺度等！ 其次係用餐時間，官方話係由入座起計90分鐘，有啲人又話一坐低，店員會同你講限時60分鐘，唔理實際係幾耐，歎個下午茶都要限時真係好痛苦，等兩個半鐘但食得個半鐘，補都補唔番！都係嗰句，預約最實際！ 再者，有啲人話佢一定係下晝2點打後先有Afternoon Tea Set供應，小妹信以為真，1點9就到，點知店入面坐低啲人就已經食緊，究竟佢係幾點先開始供應呢？ 而環境布置方面可以話集古樸、懷舊、高貴、奢華、經典於一身，不過舖面太細，可容納嘅人唔多，比起上海分店，係蚊髀同牛髀... … 食物方面種類多，味道拍得住五、六星級酒店餐甜點，不過由於係英式甜點，味道上會較甜，所以唔鍾意食甜嘢嘅人會難接受少少！加上餐牌上明明寫明可以自選四款雪糕，細問之下原來係佢Randomly畀四隻味我，令我有些少失望！ 雖然係有啲美中不足，不過小妹覺得都係值得去朝聖一下，至少佢價錢大眾化（以名牌價錢嚟講），加上所有餐具都有品牌Logo，夠晒標誌性，去一次奢華一下、扮吓貴婦都幾好呀！
