最近工業區成為大家熱捧嘅搵食熱點，無論係去Cafe扮文青High個Tea，抑或去食酒店級水準嘅私房菜同西餐，又或者食又平又抵又飽肚嘅自助餐，工業區絕對係大家發掘唔完嘅金礦，挖極都仲有未去過嘅開飯地點，試極都試唔完！ 呢間位於火炭嘅Cafe，主打懷舊同Loft風，三千呎空間盡顯寬敞，店內不乏皮製嘅梳化、天然原木椅桌、舊式電報機、工業時期嘅衣車、上海理髮屋鐵製躺椅、舊式家庭吊扇、轉盤式電話... ...全部都係有歷史嘅古董，既有紀念價值，又玩味十足！而最獨特嘅係各式各樣嘅Designer Chairs，有宮廷椅、布製梳化、原木長櫈等，全部都購自英國，可見店主嘅用心！人唔多嘅時候，食客可以自由揀位坐，而且坐幾耐都得，只要嗌一杯嘢飲，就可以 Hea住度過一個早上甚或一個下午，既寫意又自在！坐喺一個充滿懷舊布置嘅空間，時間恍如靜止喺舊時，讓食客回味過去嘅時光。 架舊式綿羊仔充滿歲月痕迹 店內陳設咗好多部法式折疊相機 上海理髮屋鐵製躺椅同舊成咁嘅色士風你又見過未? 仲有舊式電報機同轉盤式電話！ＯＭＧ！唔影低唔得！ 衣車都可以做裝飾？ 食物以日、韓、台式為主，店主特別從三地邀請廚師好友定期來港教授店員煮食方法，令食客可以食到正宗嘅日、韓、台料理。一直鍾情台灣菜嘅我聽聞呢度有台菜食，梗要嚟試試！其實我個人比較鍾意啲特別嘅台灣菜式，一般人鍾意嘅炸雞排、滷味、鹽水雞、滷肉飯我都鍾意，但唯獨對「藥燉排骨」就極之瘋狂，每次去台灣都一定要食一、兩轉，補吓身（好似有啲老，但其實我只係個八十後）之餘又解吓「相思之苦」，加上香港食台灣菜嘅舖頭又好少會推出呢個湯，想食真係有一定難度！結果畀我發現「伙食」主打呢味嘢，所以小妹先山長水遠殺入嚟食！其實個湯同台灣嘅有九成似，只係佢藥味濃啲，有少少似平時飲嘅港式大生地豬骨湯，不過飲落一啲都唔苦，反而清甜回甘，原因係佢用排骨熬製3至4個鐘，將所有排骨嘅精華都逼晒出嚟，所以佢嘅甜味會突別凸出，但係排骨又一啲都唔「鞋」口，完全拍得住台灣嘅十全藥燉排骨！ 藥燉排骨飯 $68 （另設鍋物 $150） 除咗藥燉排骨，燒酒雞都值得推介，台灣有麻油雞，呢度就有個「雞酒」升級版「燒酒雞鍋」，而且只會喺星期五至日晚限量供應！鍋入面有雞件、薑、燒酒（都幾烈吓）同各種補身藥材，隨鍋仲附送蔬菜拼盤，半打邊爐嘅形式，最啱嚟緊嘅秋冬季食！不過呢個鍋始終都有燒酒同藥材，會有少少苦味，如果唔鍾意重口味，但又想補身，可以揀藥燉排骨鍋，都一樣可以打吓邊爐同補身！ 燒酒雞鍋配蔬菜拼盤 $150 樹子炒A菜係台灣尋常百姓家嘅小菜，好多家庭式台式餐廳都會將佢列入菜單之中。A菜亦即香港人叫嘅油麥菜，唔知點解，小妹總覺得台灣人整得好食啲，所以每次去台灣食滷肉飯都一定要嗌一客送飯！樹子嚟自台灣，又可以叫香樹子或破布子，係台灣人常用嘅調味醬，味道好似豆豉一樣鹹香，除咗炒菜，台灣人都鍾意用嚟蒸魚。 樹子炒A菜 $45 至於士林香酥雞排配滷肉飯就啱晒我呢啲貪心嘅人，既可以食到炸到又香又酥脆嘅雞排，又可以食到古早味道嘅滷肉飯，真係正呀！ 士林香酥雞排配滷肉飯 $65 飯後再嚟一壺台式水果茶，既消滯又冰涼，一餐完美台菜就係應該要咁樣！你哋覺得呢？ 新鮮水果茶 $38 同場加映： 壽喜燒鍋 ＄150話晒主打日、韓、台菜，日式嘅菜式一樣唔輸蝕，壽喜燒有金菇、肥牛、豆腐、大根、烏冬及雜菜等，十分足料！ 龍蝦汁大蝦伴天使麵 $75咦？點解會有意粉？唔係主打日、韓、台菜咩？無錯，佢連西式都做埋，你話驚唔驚喜？ 店名：伙食工業 Fooody 電話：3586 0863 地址：火炭坳背灣街57-59號利達工業中心地下3號舖 (正門入口-火炭路) 開放時間：星期一: 12:00-18:00、星期二至日: 12:00-22:30
