近年興起一種叫Green Monday嘅生活態度，意旨以無肉飲食作為綠色生活嘅起點，鼓勵逢星期一作為綠色素食日，食清淡啲，健康啲，除咗可以減低個人嘅碳排放量之外，仲可以為地球球出一分力，從而愛惜資源！ 其實小妹成日都喺出面「開飯」，作為一個都市人，根本就冇時間親自下廚，要食得健康真係好難，所以長期食多油、多鹽、多糖、高脂肪、高膽固醇嘅全肉餐，真係好辛苦，奈何冇得揀，就唯有妥協？其實大家唔一定要妥協架！因為小妹搵到一間推行全素食嘅食餐廳，店內嘅湯、沙律、主菜、甜品，全部都係以蔬果入饌，完全健康無負擔！而最重要嘅係，唔使自己煮，最啱我哋呢啲懶人，加上仲奉行少油、少鹽、少糖，最啱成日出去應酬、餐餐食肉嘅都市人！ 門口嘅落地大玻璃透出一室嘅綠，賞心悅目！ 究意係花園、花店定餐廳呢？ 呢間位於灣仔道嘅OVOCAFE主打新派素食，創意嘅All Day Green Breakfast完全顛覆一般食到想嘔嘅全日早餐，半素食嘅設計，有蛋有菜，色彩繽紛，一啲都唔齋！而佢嘅菜式亦有別一般嘅中式齋菜，絕對唔會用好多汁醬調味，連沙律都只係落乳酪或沙律醋調味，唔單止唔會好似食中式齋菜咁「娘」，仲啱晒一班想食得健康又食得有「營」嘅都市人！ 是日餐單 All Day Green Breakfast （Served with any Hot Beverage）$118包括厚切番茄、迷你牛角包、嫩菠菜、燒烤菇、茄汁焗豆、香滑炒蛋、新鮮車厘茄沙律 牛角包即叫即焗，外皮鬆化，內裡軟熟；沙律菜經輕微炒過，做法創新，更能帶出清新味道！ 嫩菠菜蘋果沙律伴燕麥脆片乳酪 $78 生嘅嫩菠菜反而冇熟嘅咁大陣味，配合微酸嘅青蘋果片同乳酪，又Fresh開胃。再加上微甜嘅提子乾、杏脯肉同車厘茄，完全咗中和青蘋果嘅酸。而核桃碎亦令沙律更有咬口！ 熱朱古力配特色拉花 $40 夏季限定 荔枝蘆薈梳打 $46 雖然話係梳打類飲品，但一啲都唔會過甜，店主只會落好少嘅荔枝糖漿稍稍帶出荔枝味，始終健康最重要！ 被大量鮮花植物盆栽圍繞住歎All Day Breakfast，令人心曠神怡！ 店內有棵參天大樹，喺大樹下進餐，真係既寫意又自在！ 周圍都係綠色植物，唔知會唔會成為你嘅秘密花園呢？ 近年潮興創意盆栽，如果你鍾意，都可以買一盆架！ 全店都以綠色植物作布置，坐喺純天然嘅原木桌椅上食嘢，欣賞住四周嘅綠色植物，聞住天然嘅花草清香，食一個All Day Green Breakfast，享受一個寧靜下午，舒適又自在！雖然小妹冇時間喺星期一Go Green（始終都要返工嘛），但每個周末有一日食素都好好呀！唔單止可以感受吓環保生活，仲可以親親大自然Relax一下，何樂而不為？ 店名：OVOCAFE 電話：2527 6011 地址：灣仔灣仔道1號地下 開放時間：星期一至五: 11:30-22:00、星期六、日及公眾假期: 10:00-22:00
