最近「Real Food」在飲食界大行其道，人人都話要食得健康，無人工添加劑、防腐劑、人造色素的食物才食得安心。 咁又係，食落口喎，唔小心啲又點得？如果連雪條都可以做到以上所講嘅「三無」，各位追求健康嘅朋友又會唔會趨之若騖呢？ 呢間位於銅鑼灣禮頓道嘅手工雪條專賣店就一定啱晒追求食得健康嘅你，店舖所售賣嘅雪條係全人手製，由切水果、將水果打成漿，全部都係老闆落手落腳製造！ 點解會諗到做手工雪條呢？ 其實創辦人本來係個律師，自細喺新西蘭長大，幾年前因為患病而要戒奶類食品，而鍾意食雪條嘅佢為咗做出健康、純天然同無奶類成份嘅雪條，足足花咗９個月時間用果汁同生果研製，終於做出依家嘅不含奶雪條！ 店內嘅雪條種類繁多，分有奶同無奶雪條，無奶雪條係以鮮果打成果汁，加入新鮮水果冷凍而成；而有奶雪條則除咗加入鮮果外，亦會加入北海道特選３.6牛乳製作，又香又滑，完全可以照顧唔同人士！就算你對奶類製品敏感，都可以選擇你喜愛的鮮果雪條！有Chili Mango（辣味芒果，又刺激又冰涼，絕對係冰火二重奏之選）、Cheesy Berries（芝士莓味，又香又滑，少少果酸，中和膩感）、Straight Up Pineapple（清新菠蘿冰）、Refreshing Kiwi（真係見到奇異果肉，Selfie時不可錯過影番張呃Like）、Earl Grey Pistachio（伯爵茶開心果，上面有開心果仁，口味咁特別，點可以唔試？）、Juisy Honey dew（純密瓜汁加密瓜粒，好想咬一口）、Strawberry Hokkaido Milk（用北海道３.6牛乳加士多啤梨汁，再加埋原粒心形士多啤梨，又係另一個集郵之選）。 雖然店舖面積較細，只設有少量座位同望街景嘅吧枱，但企喺街邊食，一樣透心涼，而且店家仲會好體貼咁附上一個紙杯盛載，咁就唔使驚滴到周圍都係啦！！！ 朋友，睇到呢度，你仲會喺便利店買連鎖品牌嘅添加劑雪條嗎？ 店名「ISEE iSEE」應是取自同音字「ICY」！ 店外有很多人排隊，可見Real Food的魅力沒法擋！ 店內雪條琳琅滿目，心大心細，真係唔知點揀好！ 呢款Strawberry Hokkaido Milk係必揀，你睇吓啲心形士多啤梨俘虜咗幾多少女個心！咦？我個心呢？ 店名： ISEE iSEE Handcrafted Icy Desserts 地址：銅鑼灣禮頓道138號希雲大廈地下 電話：2337 3361 開放時間：星期日至四: 11:30-22:30 星期五至六: 11:30-23:30
