我將有左呢件事話左俾我老公知，佢個反應竟然係非常之開心。我反應唔切佢呢個反應，說到底我都係覺得佢未準備好，但見到佢呢個反應，心入面好似多左一份安穩，最起碼佢唔抗拒做爸爸，甚至表現得有點期待。我同佢講我約左醫生檢查，因為之前週數太細仲未聽到心跳，佢話佢要請假陪我去，但我已經同佢講左呢個醫生好多人睇，要等好耐。佢話佢好等得，幾耐都等，佢想快啲見下麻蓉包。星期三的早上，我地食出街啲野就準備見醫生。週數因為比較細，之前姑娘提我要飲定少少水急小便去照超聲波，本身已經成日有種壓住嘅感覺，急住小便仲辛苦>.< 。我地等左個半鐘，終於到我地見醫生。呢位醫生係朋友介紹，佢一開始就問我呢個幾星期有無咩唔舒服呀?有無肚痛流啡嘅情況，我同佢講我keep 住有少少啡，但聽好多人講都正常普遍，所以無肚痛我都無特別理會，醫生話咁等佢幫我照超聲波睇下咩情況。我瞓左喺檢查床上，姑娘幫我搽左啲啫喱狀的物體喺肚皮，醫生就準備幫我照超聲波，我望住個螢幕，見到一個圈圈，我就知道呢個係麻蓉包，但醫生不斷在我肚皮用輕力按壓，好似試圖去搵啲野，佢皺一皺眉然後就同我講，我見到個胎囊，但未聽到有心跳....我知道週數太細係未必會聽到心跳，但醫生再喃喃自語咁講，7週幾喇喎,無理由聽唔到心跳。我感覺到一陣心寒，然後醫生再幫我檢查下BB的大細，就同我地兩公婆講 : 你地要做好最壞打算，我頭先檢查時發覺BB 無咩長大，同埋而家呢個週數都聽唔到心跳，有機會是【空心胎】。我呆左，個腦再一次空白，當時未識俾反應，眼淚不其然就流左出黎。我老公攬實左我，之後醫生講嘅野我已經記唔得太清楚，我老公話醫生叫我一星期後返黎照多次，如果都未聽到心跳，就會診斷為【空心胎】。我到而家都一直喺度諗，究竟發生左咩野事? 點解會咁? 係咪我身體有咩病令到麻蓉包咁? 我而家究竟應該點做，呢個星期可以點樣捱過? 有無人可以幫到我......麻蓉包媽媽Sharon
