話說我有個好友佢好鍾意食芝士， 芝士炸雞、芝士pizza……總之見到芝士就覺得好吸引同好想食佢落肚！ 於是乎我今日就帶佢來試下米走雞， 米走雞以芝士雞煲做到響曬朵， 嗰陣時我日日放工行返屋企都見到條龍排到出曬門口， 不過而家開多咗幾間分店之後就無見到條長龍， 想食時都方便好多就咁walk in就可以~ 一坐低當然係整番個細芝士雞煲先啦！ 其實呢度除咗芝士雞煲仲有麻辣雞煲選擇， 甚至乎如果唔想食雞煲就咁嗌普通湯底都可以！ 說時遲那時快，熱騰騰的雞煲話咁快就火速送到！ 打開個蓋睇下，真係勁多雞件！而且勁多芝士！ 厚厚一層芝士好像初春踏雪一樣輕輕覆蓋住啲雞， 真係睇見都好興奮呀！ 因為雞件本身已經烹調到熟熟地，所以大概5分鐘之後就可以食得了！ 溶化了的芝士好像岩漿般呼出氣泡來(≧∇≦)有趣有趣！ 我最鍾意食呢度個雞煲，係因為呢度啲雞全部都係雞髀肉， 唔會有骨慘慘的背脊骨又或者鞋颯颯嘅雞胸， 保證全部都係啖啖肉有嫩口嘅雞髀肉！ 再配埋流心芝士， 超邪惡但係超好食呀！ 點的雖然是小雞煲，但是雞腿肉好大件，而且有成十幾件，兩個人食完都半飽，唔係講笑！ 我覺得四個人都夠食，一人都應該分到一隻雞腿！ 食完個雞煲就可以落配料打邊爐！ 如果係食芝士雞煲我個人非常推介叫個出前一丁嚟食！ 我平時係唔食出前一丁嘅， 但係來！食芝士雞煲一定要加！仲要襯啱啱食完個雞煲唔好加咁多水住， 先放咗個出前一丁，再加湯加到啱啱好cover到個麵就ok喇！ 而且呢度個湯仲會係加番芝士湯底俾你， 個出前一丁煮到熟咗之後會掛滿曬芝士汁芝士醬！ 真係好好食㗎！ 我嗰芝士朋友食完真係覺得好正，仲想立刻再叫多個出前一丁添 ，畀我制止咗咋！ 由於食完頭先個麵同埋啲雞已經飽飽哋嘅關係，之後我哋簡單嗌咗一碟肥牛同埋一碟丸丸就算~ 本來我係比較鍾意食牛頸脊嘅， 不過由於係芝士湯底，如果再配非常之肥美嘅牛頸脊會覺得好漏， 所以我哋嗌咗普通肥牛~ 不過呢度啲肥牛都好好食㗎！ 碟肥牛睇落肥膏唔多， 如果以為會食落鞋口咁你就錯喇！ 呢度嘅肥牛不單止肉味濃郁，而且仲夠曬厚切，食落夠曬質感仲好嫩滑架！係會好食到令人不知不覺就食曬成碟架囉！ 另外要介紹呢個唔係一般丸，而係手打的墨魚滑，更加係釀左入去塊竹笙入面的墨魚滑！當塊竹笙吸收曬啲湯汁， 然後一啖咬落去， 嗰陣時你就會發現有一個問題出現左！就係： 究竟係塊竹笙爽啲丫？定係啲墨魚滑彈牙啲呢？好亂呀！總之就係爽到飛起！彈到跳舞！誇張？！試過你就知！(奸笑中)
