熱愛打邊爐和雞煲的我， 在夏天也沒有停止過這個活動， 儘管吃完必定生到成塊面都是暗瘡， 最多之後食龜苓膏！ 既然犧牲色相都要食，一定係因為好好食啦！ 而且近水樓台，就喺正我屋企樓下， 好鬼衰㗎！叫人哋點忍啫！ 呢家米走雞最出名係芝士雞煲， 不過我和老公都偏好吃麻辣多一些！ 兩個人撐枱腳多食小雞煲， 不過其實小雞煲份量都已經好誇張！ 而且這裏的雞比較特別， 全部都是我最鍾意食嘅雞髀肉！ 啖啖大啖肉而且極嫩滑， 而且完全冇雪味， 一打開個蓋香到暈低！ 我覺得同佢獨特嘅烹調方法有關係！ 侍應會端上一個雞煲， 煮大概二至三分鐘之後， 會着食客們退後迴避，然後就會在雞煲上點火， 火光紅紅地炒呀炒， 陣陣麻辣香氣會伴隨而至！ 簡直聞都係一種享受！ 待火熄滅後就可以食得！ 出面好多地方食嘅雞煲，啲肉都一係鞋烚烚。一係碎濕濕，真係細細件！ 呢度因為選用全部雞髀肉，不但肉質爽彈而且毫無雪味，吸收咗麻辣嘅醬汁之後 ，多多麻少少辣 ，就算唔係食得好辣嘅都完全可以接受到 ，可以細細地品嚐當中的滋味。 而且因為有超多雞，所以食到最尾嘅時候會慢慢感覺到雙唇開始發麻，勁過癮！ 食完雞之後就可以加上湯打邊爐！ 食完個雞煲基本上都有七成飽，唔係講笑！ 所以我們隨意叫了一些配料，怕吃不完嘛！ 這裏除了這個雞煲好吃之外，這個安格斯肥牛一定要叫！ 高質量價錢抵而且夠大碟！ 一碟細碟已經足夠二至三人share食！ 而且塊塊雪花均勻， 在那鮮紅色的牛肉片上， 白色的雪花紋就好像荷花池上的陣風吹起散開來的漣漪那優雅的美態！ 輕輕灼過20來秒已經可以吃得！ 看見那雪花和肉慢慢融合在一起的情況， 巴不得立刻將那塊肥牛往嘴裏送！唔！ 吃起來完全不感到油膩，肉和雪花正好交纏在一起， 在咀肉慢慢飄散出油花香！ 眼睛不其然跟著瞇起來！ 在麻辣湯內放竹笙， 是我食米線一直以嚟嘅習慣， 因為竹笙會好索汁， 而且唔會變淋， 煮熟咗之後依然會食到索索聲！ 估唔到來到都唔單只有竹笙食， 仲要係星級版竹笙墨魚滑！ 兩樣都爽脆 combine埋一齊， 當堂覺得有combo feel！ 一下子爽脆爽甜鮮甜通通湧出來！好似街霸超級連擊一樣將我擊倒！ 最後最完滿嘅一個動作就係一個辛辣麵！ 之所以辛辣麵好食過公仔麵， 因為辛辣麵比較會吸收到啲湯汁，而且煮耐啲都唔會糊曬， 每條漲卜卜嘅麵條索曬煲湯煮到尾那特濃的精華！ 試過你就知道真係好好味㗎！
