Day 7 雖然琴日睇唔到企鵝仔失望而回，不過唔緊要，因為今日即將要去Phillip Island睇小企鵝返屋企！企鵝仔會係每日入黑返屋企，以我六月頭去計，大約係五點半左右，所以唔使太早出發。朝早就去左Queen Victoria Market。 呢個係一個名符其實嘅market，入面係一個超級大街市。 一行入去已經係海鮮檔。海鮮好抵食！ 生蠔！AUD12 一打！港紙8蚊一隻！！！香港搵到嘅，同樣係Coffin Bay，平平地都要14蚊一隻啦！而且呢度仲新鮮好多，好多都係睇住佢即開！海水味濃，我鐘意！ 除左海鮮，仲有肉、芝士、生果、乾貨賣，真係好多野睇 。好鐘意呢度，可惜之後再冇時間，如果唔係我實去多幾次。 食完生蠔就去集合出發去企鵝島，中途經過一個農莊，入左去玩。其實都冇咩特別，都係剃羊毛、餵袋鼠咁樣。不過呢度就圍住晒啲袋鼠，只可以隔住鐵欄玩，我就冇咩興趣。 呢樣野就有趣得多─袋熊，個樣好似豬。同團有個大陸女人問我：『咩黎架？』我就答佢：『袋熊黎架！』佢聽完之後話：『下？袋熊？唔係呀嘛哈哈！』之後走開左。唔信咪算囉=.= 就快到企鵝島喇！落地行下鬆下筋骨先！ Yeah!!! 準備入場！ 可惜嘅係，因為叫極啲人唔好用閃光燈影企鵝仔啲人都唔聽，所以依家直頭唔準所有人影相。因為企鵝好細膽同埋眼睛好脆弱，就算冇閃盲佢，佢一驚就走返落海，好可能就會餓死企鵝BB！>.< 係呢度冇影到相，只能夠將企鵝仔個蠢樣記係腦入面……
