睇左兩個星期, 啱啱終於睇完本After You。 話說早個幾月Me Before You 套電影好hit， 咁啱去台灣喺誠品發現原來佢有續集，心血來潮就買左落黎。 本身未打算咁快睇，但半個月後喺大阪番香港嘅客機上面睇左Me Before You嘅電影， 番到香港就急不及待開始睇After You。 老實講，Me Before You （電影）係有啲催淚位，但又唔係啲人講得咁好睇。 主要原因係我冇共嗚： 臨尾喺海灘Will嘅剖白係我覺得最好嘅一段。有幾好，好多人已經share左，唔駛我講。不盡如人意嘅結局亦感覺嘅現實唔離地。 而中段Will鼓勵Lou做好多唔同嘅嘗試，又向Lou描繪巴黎嘅美好。感覺好似一個智者點醒一個愚民咁。 之但係Louisa Clark 本身有個溫馨嘅家庭（又有屋），感情穩定嘅男朋友，雖然失業但又搵得番一份夠養家嘅工（就係因為咁先會邂逅Will Traynor）。 其實我完全唔明有咩野咁慘。係香港佢完全可以被稱為一個現充。甚至某程度好過好多香港人。 反而意外後自暴自棄嘅Will比我嘅感覺先係可憐嗰個。可憐有為青年變得有為不在，更可憐係佢放任自己嘅傷痛令所有人更加悲哀。 所以我覺得Me Before You比我嘅感覺係有矛盾。Will所教Lou嘅，有好大部分係建基於你有子彈去Buy your freedom（不過佢想愛人活得更好呢part係表達得幾唔錯）。而且電影太短（唔夠120分鐘），每個角色嘅描寫唔夠深刻，角色之間嘅羈絆唔係咁足，好似唔係好有力去承托理應好有重量嘅感情。 其實我懷疑書係流暢好多。 至於After You，我覺得好過Me Before You（電影）好多。而且我覺得電影開左個咁嘅頭好難可以拍到好嘅續集。 首先Lou經過Will嘅事後嘅bear唔到渾渾噩噩過日子係好有力，一啲都唔覺得突兀。一步一步走出陰影似番個人，亦都係正常嘅流情，雖然都有啲好戲劇性嘅情節：天台墮樓死唔去、故人原來有個女、Paramedics係個hot man而又係你supporting group裡面小鬼舅父等。但Lou嘅各種爭扎、猶疑不決甚至係逃避係引人入勝。當一件一件事煮到黎要Lou食，會令你諗，如果係我我會點呢？（結論係我根本冇勇氣去放棄一啲野去換取有可能係更好嘅野。好廢呀可？） 另外就係After You 嘅每個角色都立體。好似Lily咁，有sweet嘅時候，亦有叛逆嘅時候。Treen有一個好嘅adviser嘅時候，亦有好manipulating嘅時候。Sam有溫柔嘅時候亦都有impatient嘅時候。Lou亦有想努力，努力過頭同埋想放棄嘅時候。事情嘅發展亦都較真實：唔係你努力就會有好結果，但有時好運完全會由天而降。但Will始終一直被美化（儘管佢年青時真係complete arse），或許死者已矣，所有人都只會想一個人嘅好。 雖然After You 冇Me Before You 咁震撼嘅結局（我指意識而唔係畫面），但卻係深刻好多。佢唔係催淚彈令你爆喊，而係好似洋蔥咁令你枕住眼風濕濕。 老老豆豆宜家想睇啲喜氣洋洋嘅Comedy調劑下～
