今日講貓。我相信大部分人都覺得貓咪好可愛,但除左「喜愛」之情,有唔少國家更對呢種生物有住「敬慕」之情,並且將此情寄予貓貓身上,令佢地成為某種「神明」或者位高權位既「貓物」。我將會提出六個貓咪受愛戴既原因,並舉出幾個網絡紅「貓」既例子,唔知愛貓既讀者又認唔認得出佢地?你又知唔知佢地既秘密武器呢? 一. 清理害物 先講貓咪既先天性優勢:自古以來,貓咪清除害物 (例如昆蟲、老鼠及蛇等等) 既能力都深受人類讚頌,因為咁樣可以幫助人更完善地維持衛生水平同保存倉庫食物。希臘視貓咪(圖)為生育( fertility)同保護 (protection)既象徵,更將佢地捧埋上神壇 ,尊名叫「Bast」! 二. 卡娃伊呢 除左功能性之外,一隻貓如果生得夠可愛都會得到人類既愛慕,從而令人類化身成甘心情願既「貓奴」。點解?根據人腦既進化反應 (evolutionary response),人類會傾向照顧所有貌似人類嬰兒既生物,因此會認為貓咪可愛,並給予無限既關愛。講到可愛,我會舉小玉 (圖) 為例,雖然佢已經離開左我地,但我相信佢最能夠證明可愛能夠為貓帶來一定既「地位」。受車站主人既垂青,佢成為左日本和歌山縣紀之川市和歌山電鐵貴志川線貴志站既女三色貓站長。佢既可愛吸引左世界各地既粉絲前黎探訪,更帶動本地經濟,仲救埋車站免受拆除! 三. 夠醒目 相比狗狗,貓咪大部分都表現出聰明既一面。雖然貓既腦只佔自身身體約0.9百分比,亦只佔人類身體約2%百分比,但你地絕對唔可以低估佢地既智慧!佢除左有神一般既記憶,更擁有極強既解難及決策能力。有研究指貓咪既想象力亦非常高。Kido (圖)係一隻網絡爆紅既貓,我相信你都知道佢每次玩猜豆子遊戲都能夠準確猜中杯中物去左邊啦! 四. 「我係你波士!貓奴!」(喵喵喵~~~) 貓就好似皇帝一樣,好鍾意操縱人類。佢地利用左我地既腦部生理構造,馴服人類為佢地進貢糧食、按摸、執貓砂…… 貓咪對自已既優越感亦得到動物心理學既證實:當一隻貓對住人發出「喵喵」聲響,其實唔係為左撒嬌,而係做出給予指令既動作。從日常生活中都可以睇得出,貓既行為比起狗較任性,更唔願意聽取主人既命令 (除非有獎勵)。例如圖中貓咪之所以做左網紅「皇阿瑪」,令台灣主人們許配眾多佳麗俾佢,都係因為佢既叫聲充滿哂霸氣,佢成日命令主人喂糧或者貓草俾佢,先會得黎呢個稱號。又肥又可愛既阿瑪收買左唔少人類子民既心,本人是其中一個 (哈哈……)。 五. 同人類保持距離 同狗相比,貓會顯得較為獨立。佢地未必會時時刻刻主動親近人類,但反而令人類更加迷上貓。有理論架,唔係隨便吹出黎!跟據心理學入面既稀缺性原則 (The Scarcity Principle),人類傾向重視難以獲取既事物,例如難中既六合彩、難買既物業、難得既荀盤男友、難取既百佳禮卷……同難以接觸既貓!貓某程度上訓練緊人類,令人需要付出更多既心力去獲取自已既好感。例如John呢隻貓,死都唔俾主人摸佢,但主人仍然是愛不釋手! 六. 貓既出現本身就是美好的 依度講緊既係貓的象徵性,單單佢地既出現就足以風靡人類呢個星球,例如好多義工都會帶貓咪或者狗狗去做義工一樣,唔係因為佢地識得玩雜技或者識得魔術,佢地只要存在就能夠令人有治癒既感覺,勝過所有一切…… (回音)。Larry堂堂一個擁有內閣辦公室既首席捕鼠官,但佢捕鼠既功力一直受到外界花生友批評,原因係呢隻可愛既官員每日最常做既就係食飽訓教無事做……不過咁樣都無動搖到佢既「地位」,即使卡梅倫要辭退首相職位,佢仍然冇被捲入政治風波當中。有分析指,Larry既存在象徵住英國既穩定 (symbol of stability),增加左國民既向心力。依隻貓仲開埋Twitter,方便同佢既子民接觸。佢仲做埋外交大使,成功同美國總統奧巴馬等名人建交添。 愛一樣事物唔代表同時尊重它。我寫呢篇文是希望人們除了愛貓,亦要懂得尊重貓。 喜歡這篇文嗎?邀請你到我的Facebook專頁讚好! 或按此圖俾讚或分享!