繼續講Pokemon Go!講既唔係最多人談論既必勝攻略,而係關於性別研究,因為本人自問仍然對呢個Game唔係深入了解 (讀者們請多多體諒)。 點解要突然談論這個?係由於今日我係Facebook睇左一條影片,影片同我幾日前分享既文章《假如我男朋友是寵物小精靈訓練員...》差唔多,係關於五個同女朋友玩Pokemon Go最常出現既情況,當中有幾個意見我唔多贊成,亦發現從男性角度睇女性好容易有偏見,所以想係依度同大家分享返我既見解。此文章是爭議性的,所以歡迎唔同讀者發表個人想法! 一. 被定型? 先講理論,再講影片分析。受性別定型(Gender stereotype)影響,部分人未必會將電玩同女性關聯在一起,即使玩Pokemon Go都唔例外。係傳統Gender Studies領域入面,男同女既性別行為(gender behavior) 容易受到一道鴻溝所相隔,亦即是Gender boundary,女囝甚少做男既性別行為 (例:打機),而男囝亦唔受社會容許做女性既性別行為(例:化妝)。"Gender is socially constructed." 意思係性別行為是由社會所建構,無論你係男定女,原則上你都可以做任何事,但由於每人都受到'社會化既影響 (Socialization),例如家庭、社區、學校、教會等固有思想既薰陶,潛移默化下就會受影響,迫自己或他人符合社會期望。 影片設定既女演員「完全」無聽過Pokemon Go,而佢男朋友就擔當一個資訊提供者 (Information provider),咁樣令我有一點困惑……難道係呢個時候仲會有人未聽過依個Game?女生顯出一種較弱既姿態,玩既過程中亦需要依賴男朋友做任何事,感覺唔太能夠反映現實,其實女囝都可以玩得勁架。 二. 男女平等 講真,今次Pokmon Go發揮左一個不能被忽視既作用:呢個遊戲增強了男女平等 (gender equality)既觀念,佢為女囝提供左一個公平既平台,展示自己既「跨性別」(cross-gender) 興趣同才能 — 即係唔只男囝玩得沉迷,女既都可以;唔只男囝玩得叻,女既隨時強過男玩家。我見依家唔淨係得男囝玩,好多女囝朋友已經升到勁高Level,Po曬貼文! 三. 天真定無知? 而家資訊發達,女朋友唔一定要從伴侶口中收集遊戲資訊既。只要女囝一開Facebook,所有資訊通通出現係面前,又駛鬼要男朋友講先知咩精靈叫咩名咩。而且好多野其實係common sense,可能影片中女囝既智商設定左為超低,當男朋友叫佢掟個精靈球出去,佢竟然掟部手機出去……咁樣略嫌低估左女生既智慧…… 四. 相機捉先?真定假? 食飯既時候女囝相機食先就聽過,相機捉先就……我唔排除好多女囝會po文呃Like既,但如果係我,我係男朋友面前會第一時間捉左隻小精靈先,原因有三個:第一,捉到既小精靈先係屬於自己,先有曬文既價值;第二,捉左精靈之後可以重返圖鑑版面,到時再Cap圖都未遲 (顯示既資料會更多,仲有得幫小寵物改名);第三,點解稀有精靈出現左仲要麻煩男朋友立即cap圖?男朋友又會開心?醒目既女朋友當然唔會自討苦吃。 五. 反應過大? 女囝有時見到小精靈高呼未必一定同精靈本身既稀有程度有關,有時佢係希望同男朋友有互動交流既機會,增加話題。見到男朋友一直望住mon,係隔離既女朋友如果唔講D野,零溝通,都幾悶。至於男囝,就應該珍惜同女朋友討論既時間,因為咁代表住你既女朋友好在乎你!想同你溝通! 六. 點解問點解 作為女囝,我明白點解女囝成日問點解,第一可能係佢真係唔明做左Pokemon Go霸主之後有咩實際用途,想同男朋友認真討論;第二可能係佢想俾男囝一個表現既機會,等男朋友可以展示自己既學識,等佢更有自信心;第三可能係女囝撒嬌既方式都未定。 不過男囝無論幾唔想答女朋友既「低智商」問題都好,都唔好同女朋友講佢唔適合玩呢個Game…事關你一下子否定左女囝自身既價值,你會死得好慘…… 當然影片有時為了增加娛樂性,會好容易為男女角色定型,所以以上分析只是針對影片內容以供參考。我已經分享左六個有關Pokemon Go性別研究既小心得。如果你對性別研究有興趣,或者對我既睇法有咩感想,歡迎你留言話俾我知道,多謝支持。 喜歡這篇文嗎?邀請你到我的Facebook專頁按讚! 或按此圖俾讚或分享給朋友!