首先好感謝閱讀【假如我男朋友是寵物小精靈訓練員…】既朋友,今次繼續以女性角度討論Pokemon Go!事關男朋友今天放假,傾好左出街拍拖,所以就試驗下邊拍拖邊捉寵物小精靈,俾有興趣既情侶們一點點拍拖小心得!我地決定要去既地點係……尖咀海旁! 1. 重要的事要說三次:尿袋!尿袋!尿袋! 好可惜既事係我Android電話一開Game就超食電,無尿袋既我好快就被宣佈死亡 (呈清返,D相係手機臨終前影落)……而我男朋友因為用iphone既關係,玩左一陣都只係食左幾%電姐,超羨慕的…所以驗證左粉絲們講既係岩,帶定尿袋!尿袋!尿袋! 2. 證實巴士係捉小精靈唔錯既交通工具 網上話電車效果最好,但由於我同男朋友都驚熱,所以選擇左搭巴士,巴士有冷氣,絕對比用電車方法捉小精靈舒服,而且可以用路程黎孵蛋 。我地揀左搭1A巴士直接到尖咀海旁,發現佢勝在經常停站,而且行駛車速慢,所以好容易捉小精靈 (車上佔八成既男囝都玩緊,wow…)。係巴士上面,沿路一直都有好多精靈球同小精靈,基本上「越近海邊越多」! 3. 低CP值小精靈都好重要 我男朋友話我知,當你急住升呢既時候,即使係蝙蝠、綠毛蟲、波波、皮皮定多多都好重要,原因第一係可以儲經驗值,第二係可以幫佢地進化。我男朋友儲了唔少蝙蝠,CP值最高都有千幾,一程巴士亦幫佢由Level15升至Level16! 4. 海旁氣氛一流 我地去到尖咀海邊,已經發現周圍都係小智,拎住部機猛禁。見到咁多人一齊玩其實都幾有feel,你興奮時其他人都興奮,有種人與人之間既無言互動,好特別。最得意既moment係當你企係度收緊精靈,其他爸打會默默企係你附近,簡單一句係「You go, they go」。有個男囝仲大聲講:「上!伊貝!」我地不禁笑左…… 另外,作為熱門拍拖地點黎講,尖咀都唔錯,有風景睇,有長廊俾你散步,怕熱又有文化中心俾你嘆冷氣 (借埋廁所…唔駛排隊好感動)。 5. 地圖王 基本上呢次寵物小精靈之旅既行動方針以追逐海邊出現既小精靈為主,所以非常依靠玩家閱讀小精靈GPS地圖既能力。幸好男朋友是地圖王,我只需要做跟尾蟲就可以了。第一站係海港城,商場範圍有好幾個撒櫻花既地點,捉左唔少較低CP值既精靈。話說海港城前面既藍精靈好可愛喔,影左相,Gotcha! 6. 打書釘 入到海港城驚喜發現誠品生活,入面有書賣、有野食食、有珍珠奶茶飲、有精品賣,作為約會地點超棒。唔想行黎行去既話,店內仲提供桌椅俾你坐低刨下書。因為男朋友幫手,成功fight到位坐,我就睇左半本蔡康永既《蔡康永的說話之道2》,很值得睇!而男朋友就揀左一本心理學書黎刨,今次multi-tasking失敗,為捉精靈而淨係睇左幾頁 ~ 7. 小火龍唔見左啦 (嗚~) 文青完畢,根據小精靈GPS地圖,仲有十分鐘藝術館後方位置既小火龍就會消失!原來小精靈除了突然出現,維持出現既時間只會係15分鐘,過左timing就會消失架啦。呢個遊戲設定真係強,唔怪得令咁多人表現咁積極。我地行到星光大道既入口,好快就望到小火龍,但命運就係作弄人,拋左三次球都fail,仲要唔見埋影! 8. 捉到鴨嘴火龍 慶幸返去碼頭既途中,男朋友都收返隻鴨嘴火龍,CP值有成688架。 9. 人都溶...召喚!雪糕! 臨走前當然要食雪糕。尖咀雪糕車既雪糕係好味既,不過都太貴了,升至九蚊一杯耶! 10. 搭巴士返歸...孵出卡比獸! 原來孵出既蛋係可以有咁高Level既小精靈!而且好可愛,有點似Baymax ……最後一程巴士Level由16再升至17,今次出遊值得啦 (對男朋友說)。 今次拍拖經驗好新鮮,其他女囝不妨同男朋友試下咁做! 最後總結一下,今日收集到既小精靈有:蝙蝠、波波、皮皮、多多、三頭多多、車厘龜、波波球、傻鴨、蚊香蝌蚪、滾動石、鉗刀甲蟲、護主犬、大眼水母、小火馬、 鴨嘴火龍、伊貝同卡比獸,收獲都幾豐富。 男朋友 ,Nice Catch! 喜歡這篇文嗎?邀請你到我的Facebook專頁讚好! 或按此圖俾讚或分享 你或有興趣繼續閱讀: 《假如我男朋友是寵物小精靈訓練員...》 《十個同宅男拍拖會遇到既情況》