上回講到假如我男朋友係寵物小精靈訓練員既十個徵症，今回分享十個同宅男拍拖可能出現既情況！有遇過既歡迎你留言話我知，好高興同你分享更多。 一. 做了「第四者」 同宅男拍拖要接受既第一個現實係：電腦係佢青梅竹馬既老婆，手機係遲黎既二奶，而我...只係排名第三位 ...... (無言) 你地又係咪？ 二. 放假係屋企打機 難得放假既宅宅男朋友當然唔會太肯出街，掛住留係屋企打機既佢會唔會又忽略你呢？ 三. 勁多「機」友 當男朋友有一大班男性機友既時候，你會懷疑佢究竟係咪gay，因為機友們隨時都可以勾引男朋友一齊打機，而且大多次數是成功的 (除非我發飆)。 四. 「左右逢緣」(誤) 岩岩開始拍拖既宅男自然唔會夠膽咁做啦。但慢慢拍耐左拖既佢當急住要幫部game升呢，又無奈有女朋友係身邊既時候，就會施展一式「左右逢緣」！What? 放心，佢只不過係左手揸機，右手拖你姐 ...... 五. 口中好多你唔明既打機術語 「RIP」、「GG」同「FF」都係我識左宅宅男朋友之後先至知道佢既意思同源頭，但其實仲有好多terms你永世唔會明白，例如點解就黎冇血既人會叫「殘血」，咩叫「banana」，咩叫「冇勁」(罵人無用?) (如果有人知道，歡迎你留言)。不過男朋友多數都唔會同另一半解釋太多，佢會話「講左你都唔明」... 有遇過以上情況既女朋友們又唔駛太悲既，雖然你男朋友係一個典型宅男，但都會有你想到、想唔到既好處！負能量放完，而家到正能量，哈哈。 六. 淨係陪你一個 雖然佢既「靈魂」顧住打機，但佢既「驅體」仍然與你同在 (阿門?)。放假既時候，兩個人各自做自己既事 (我係佢隔離煲劇)，但同一時間仍然陪住對方，感覺都幾浪漫啊。唔好低估男朋友既multi-tasking skill，你有需要佢既時候，錫你既佢仍然會有回應的。 七. 唔會出去浦 一件可以肯定既事係佢唔會去浦，所以你會有一份安全感。當你男朋友既興趣主要係打機，佢未必會喜歡出去多人既地方。佢要既好簡單，俾佢得閒既時候打下機就滿足。你唔駛做一個患得患失既女囝，唔需要擔心男朋友去識其他人，因為你總會知道呢一刻佢大概做緊咩。 八. 呆萌值提升 呢點講真真係各花入各眼，你可以話自己男朋友似一碌木 (佢可以長時間對住部腦)，亦都可以話佢幾可愛。我個人覺得宅男都有可愛既一面，尤其是佢同機友傾攻略既時候，見到佢對自己戰績洋洋得意既時候，唔小心俾敵人用槍射死勁激動既時候。 九. 細心 其實打機本身是需要極高既觀察力，有時過關卡要靠自己摸索事物，遇到敵人反應都要夠快 (否則就GG)，所以如果男朋友係一個宅男既話，你或者會覺得佢比起其他粗線條既男囝細心，可以係細節上懂得關心你。 十. 做自己 邊個唔想做返自己？你想做自己，你男朋友都想啊。你問我既話，我還是會俾男朋友空間做返佢自己，咁樣佢又開心，我都會開心，唔只因為你想佢開心而開心，而係你的另一半都會由於得到尊重而更錫你。 當然經營感情仍然好重要，作為男朋友既佢無可能只係顧住打機。商量一個大家都接受到既方案，例如一日放假來打機一日就陪你出街，都是好辦法。記得要良性溝通喔。 留言話俾我知你的想法或者你專屬既「宅型男友攻略」，我隨時都樂意聽！ 喜歡這文章嗎？邀請你到我的Facebook專頁接讚！ 或點擊此圖按讚或分享！ 你或會有興趣繼續閱讀：《假如我男朋友是寵物小精靈訓練員...》
