因為工作關係，每日都要著高踭鞋返工8個鐘，長時間企同行路。最近多咗時間感覺到腳踭痛，特別係朝早起身，雙腳一落床，就會有一陣刺痛感覺，呢個情況維持咗一個月，以免再惡化，就要去睇醫生，原因係自己一直都有扁平足，而且依家仲患上足底筋膜炎......OMG 咩係足底筋膜炎？拎咗診所嘅小冊子返屋企詳細睇睇，知道「足底筋膜」係一層筋膜組織，連接腳趾與腳跟，作用係支撐足弓。足底筋膜炎即足底筋膜組織同埋周圍嘅軟組織受損而引發嘅炎症。由於日復日都需要著高踭鞋工作，令到前腳掌同埋腳踭嘅部位長時間承受整個身體嘅重量，再加上返工時幾乎只有 lunch 一小時先可以坐低休息，所以足底筋膜出現撕裂嘅狀況，隨後發炎，雙腳就會感到痛楚。其他常見原因︰患有扁平足人士，上網再搜尋多啲扁平足資料，扁平足有分為先天性 (天生) 同埋後天因素。意思係腳部內側具有較低嘅足弓，簡單嚟講即係腳掌平放係地下時，腳部內側與地面之間嘅間隙，拱曲弧度偏少。患有扁平足人士嘅腳底筋膜比一般人承受更多嘅壓力同埋重量，出現筋膜撕裂嘅機會較高職業運動員，因為佢哋長期接受腳部有關訓練懷孕婦女以及過重肥胖人士，因為佢哋腳部承受嘅重量較多，因此比起一般人，佢哋足底筋膜負擔都會更多經常要企嘅工種人士，例如售貨員、老師、餐廳侍應等等舒緩足底筋膜炎方法如果發炎情況已經好嚴重，痛楚感覺加劇，影響日常生活，咁就一定要立即尋找專業嘅足底筋膜炎治療，物理治療等等。輕微病情的話，整合咗好多專業人士嘅建議，有幾點可以係日常生活做嘅舒緩方法俾大家參考一下。1.伸展運動第一款︰小腿伸展運動 (之前歐錦棠都有分享過)先企係一面牆前面，雙手平放係牆上，右腳屈曲，左腳伸直，留意腳趾要向正方身體慢慢傾前，伸展左腳小腿肌肉，腳跟唔好離地面，保持呢個動作30秒換腳做以上相同拉筋動作，重複做2-3次就可以第二款︰腳掌伸展運動先準備一條毛巾，放係地下，人坐係櫈上踏係毛巾之上之後用腳掌抓住毛巾，腳趾需維持平放姿勢，然後放鬆腳掌，重複呢個動作20次，再換腳做20次2. 浸腳有中醫推介浸腳可以幫助氣血流動，舒緩腳部痛楚。夜晚沖涼之後，用少於45度嘅暖水浸腳15分鐘，促進到血液循環，新陳代謝加快，係對組織修復有幫助。亦都可以係暖水加入川芎、艾葉等中藥，可以先諮詢一下你熟悉嘅中醫師。3. 矯型鞋墊度身訂造合適自己腳形嘅矯型鞋墊，保持足弓在正常高度，可減低足底筋膜嘅壓力同埋拉扯。令雙腳有足夠時間休息並唔係好多工種市民可以做到。我自己的話，唯有先係日常生活盡自己能力做好啲，先選擇著一對低踭粗跟鞋返工、空餘時盡量做伸展運動、每星期搵3-4晚浸腳，希望可以舒緩、減輕足底筋膜炎嘅症狀。如果痛楚加劇，一定要快啲尋求專業人士診斷同埋治療，「病向淺中醫」呀！
