最近戲院開番，諗住趁孖寶未夠一米高可以免費入戲院睇戲，叫隊友買票。點知隊友左耳入右耳出，買足4張票😤!我都唔知好嬲定好笑，諗住就黎無得用優惠既最後一擊😂😂。不過算吧!當坐得舒服d，而早場都只係38元一張票，唔算貴。今次放過🐽隊友吧! 適逢推出多啦A夢50周年紀念作:大雄之新恐龍大電影，我地已先睹為快喺星期六(26/9)睇左優先埸。 孖媽竟然睇卡通片睇到喊😭😭!睇之前我完全無睇過介紹，乜都唔清楚。(下文含小量戲透)點解會咁感觸?因為大雄喺套戲入面嘅角色好似「媽媽」👩，養左兩條小恐龍，仲要係龍鳳胎恐龍。家姐恐龍叫小Miu，細佬叫小Q。小Miu性格同玥姐好似，都係天真樂觀、自信勇敢、喜愛吃和照顧細佬。小Q又好似晨弟，性格內向和膽小怕事，其實也很似大雄。由出世到成長，大雄都一手一腳用心落力咁照顧佢地。有次小Q病左，大雄不眠不休咁照顧佢，好似媽媽咁不計勞苦照顧自己嘅小朋友。到大雄要返學，兩隻小恐龍會係窗邊喊住咁望住大雄返學，好似我以前返工，孖寶會喊住係閘門跟我道別。大雄放學又會趕住返屋企見小恐龍，完全係在職媽媽放工趕住返屋企見小寶貝既情境。所以我好不自覺代入左大雄個角色，將孖恐龍當作孖寶。是我太感性吧!?😜小Q一直都唔識飛，大雄一直都好努力教佢飛同鼓勵佢。雖然跌倒和失敗過無數次，但係大雄既鼓勵下，最後也成功。就像父母在小朋友成長的過程中，不斷鼓勵和在背後默默地支持，令他們成長。到最後，恐龍始終會長大，也要與大雄分離。正如小朋友始終會長大，也會與父母分離，建立自己的家庭。所以現在要好好珍惜與他們的親子時光。養育小朋友就是慢慢地看著他們長高長大，然後一步一步地愈走愈遠。有時候，真是害怕他們長大得太快;有時候，會懷念他們仍是一團小海棉;有時候，想坐時光機回到過去，緊緊地抱著剛出世的你們。孖媽太多狂想了，現在最想他們能健康快樂地成長!這齣電影除了是媽媽的寫實外，亦教曉小朋友凡事都不要輕易放棄，只要肯努力，終有一天會成功!總括而言，孖媽真心推介帶小朋友去睇多啦A夢：大雄之新恐龍。無論媽媽定小朋友睇完，總會有點得著。希望大家喜歡我的分享，謝謝! ~我是前教師媽媽，喜愛分享育兒教學心得和食玩情報~~歡迎瀏覽~like and follow~~Facebook page:https://www.facebook.com/Miss.swanswan/~Instagram:https://www.instagram.com/little_twin_stars82/~歡迎合作~
