停課停左七個月， 阿媽本來退左休， 但係屋企要做番老師，日日對住兩隻小魔怪 ，真係好辛苦!但見到佢地有得一齊玩，唔會咁悶，頓時覺得湊孖寶雖然好辛苦，但停課期間卻見姊弟情的珍貴，辛苦都值得的 。 兩個一齊，有時會玩煮飯仔，一個扮客人，一個扮廚師和待應;有時會一齊玩媽媽設計既學習遊戲，可以玩些二人一組既活動;有時佢地會傾下計;有時會互相追逐，總之係屋企都唔會悶。 慶幸佢地同年紀，玩既野都一樣，稱得上志同道合......哈哈~但正因為咁，佢地小時候需要媽媽既照顧方面也會一樣。兩個差唔多時候要飲奶，阿媽要餵邊個先呢?兩個都差唔多時候要訓覺，兩個一齊逗訓覺其實都幾難。係街度兩個一齊扭眼訓先恐佈!細個時推bb車，兩個都要我推，唔通我一個人推兩架bb車咩?最後買左架孖b車，唔怕爭...哈哈~到再大D，無用BB車，兩個一齊扭眼訓時，我手抱一個，另一隻手拖一個，真係無番咁上下臂力和腳力都帶唔到佢地返屋企。 係屋企，爭玩具是每日家中之日常吧!我平日會用以下方法減少爭玩具:1)分開兩個地盤玩 安排各人一個活動位置。如果要油顏色，分派每人一張枱和一盒顏色筆。2)分派玩具 二人輪流挑選玩具，各人輪流揀一件直至分完。3)分派角色 如果要玩煮飯仔，一個扮廚師，一個扮客人。4)輪流玩玩具 如果兩個都一定要玩同一樣玩具，我會讓他們先猜包剪搥決定誰先玩，然後輪流。如果兩個 都一定要先玩同一樣玩具，我就會收埋， 直至兩人不再爭才拿出來。 當然最好既係佢地會守規自律不爭玩具，但分享係須要時間學習。而且有時媽媽都想抖下，俾佢地自己玩一陣。另一方面，佢地爭玩具除了真係想玩之外，亦出於爭寵和妒忌。佢地一出世，本來只屬於自己既媽媽已經要同人分享，無法獨享媽媽的愛和照顧。媽媽真係無法好似玩具咁被瓜分，只能在各方面盡量取得平衡。以前我係在職媽媽，早上五時多就要起床，再加上上班很用神，對我來說，一晚醒來至少四次簡直是一種折磨。所以大寶玥姐便交給工人姐姐照顧。最後令大寶有一段時間好唔開心，冇左笑容。後來我最後也選擇左同兩個一齊訓，縱然很辛苦，但大寶重拾笑面。至於出街玩方面 ，小時候，我會咩一個出街玩，玩完返屋企放底，再咩另一個出街，分上下半場。試過有次同一日分兩次去海洋公園，叫工人姐姐咩一個到海洋公園交收小朋友.....哈哈.....很搞笑吧!朋友們都話我仲乜要咁辛苦?帶一個出去都累，仲要一日帶兩次。其實小朋友雖小，但佢地係知道邊個陪佢多D，內心會有比較。時常內心都覺得虧欠了玥姐。當年她每次被工人姐姐帶入睡房也哭得死去活來。所以只要我還有能力，我會盡量花時間陪伴兩寶，不偏心。 湊一個時，媽媽可以全心全意照顧。但有兩個寶寶，不論媽媽給寶寶的精神或時間也會被分薄了。每天花些二人獨處的時間，讓寶寶感受媽媽對他全心全意的愛。不論有多少個寶貝的媽媽，大家也加油!至於兄弟姊妹們，雖然每日都爭D樣爭果樣，但如果問佢地無左家姐/細佬好無?佢地次次都答唔好呀!我好鐘意家姐/細佬，好鐘意同佢玩。嗱~爭還爭，佢地都知道兄弟姊妹是爸爸媽媽給佢地既大禮物!陪伴~不論是父母的還是兄弟姊妹的，都是小朋友最珍貴的禮物。 歡迎瀏覽~like and follow~Facebook page: https://www.facebook.com/Miss.swanswaninstsgram: https://www.instagram.com/little_twin_stars82
