朋友約我黎南瀛水產食，話訂位app有半價，咁抵食，而且好耐無食浜燒，就上黎食個晚餐。 上到黎見到個裝修真係哇一聲，好有日本水產市場既感覺，仲見到活海鮮添。 餐牌都好有日本風，好多日文，仲詳盡介紹各種日本魚，真係學到野。 <番茄沙律>（$68） 幾大份，預拌柚子醋，幾開胃架。 <芝士流心南瀛玉子燒>（$88） 芝士夾係雞蛋中間，切開有芝士流出，有曬視覺效果，食落芝士味幾重，口感滑溜，好正。 <香蒜牛舌>（$88） 入口即溶既感覺，咬落軟綿綿，用香蒜燒超香。 <海老天婦羅>（$198） 天婦羅黎講呢個蝦真係好新鮮，好彈牙，唔同平時果啲炸到老晒。 <平目刺身>($238) 薄切平目魚，即係左口魚，油脂含量唔高，點酸汁食，配上上面既魚籽，口感爽口。 <雲丹蟹肉卷>($228) 面頭既海膽，口感滑溜creamy，一啖入口，同啲飯同中間帶有濃濃蟹味既蟹肉一齊食，簡直完美。 <蟹味噌甲羅燒>($156)、<牡蠣>($156) 主角黎啦，個蟹蓋超多蟹膏，上面有蛋液同蟹籽，侍應比我地打左卡先開始燒。 大概10分鐘就完成，期間望住啲蟹膏係度滾出泡 ，好特別。 食落係濃厚既蟹膏味，配上爽口既魚籽，同埋蛋液提味，簡直係蟹膏控最愛。 唔好誤會，牡蠣唔係生蠔！係要燒黎食！其實品種係台灣既蚵仔既巨型版。食落超厚肉，唔洗點調味料已經超有味。 <柚子燒酎>($68)、<熱情芒果燒酎>($78) 我同朋友平時都唔多飲酒，叫呢種調味燒酒啱曬。我呢杯熱情芒果酸酸甜甜，真係幾好飲，雖然話酒精濃度達25度，我地平時唔係飲開既，都幾ok喎。 呢度枱與枱隔好遠，夜晚個場又頗多人，完全可以用正常音量傾計而又有足夠私隱。
