不知何時開始，每晚放工後都想搵間有特色的餐廳去滿足一下心靈，香港的餐廳選擇太多了，周不時又有大量新餐廳湧現，有選擇困難症是少不免的。今晚同男人就去左銅鑼灣百樂中心的Chez Bistro食晚飯，小妹好好想試餐廳出品的鵝肝焦糖燉蛋，令我回想起另一間餐廳的鵝肝燉蛋，好味得讓我念念不忘。 原文網址: http://connie-hk.com/chez-bistro 點擊圖片放大 香港租金昂貴，愈來愈多餐廳開在大廈的樓上，但質素也相當不錯，甚至會有驚喜。是晚這間餐廳位於百樂中心21樓，樓底頗高，空間感足，環境寧靜，整頓晚餐都坐得舒適又放鬆！ 晚市有供應 3-Course Dinner Set (18:00pm-22:00pm)，$298-$398不等；套餐包括沙律、湯、主菜、咖啡或茶；主菜有肉眼扒、無骨羊扒、伊比利亞橡果、雞卷及海鮮類，不過小妹想食的鵝肝燉蛋就要另外散點。 先上一藍麵包給我們，可配搭橄欖油和黑醋，麵包微熱，質感軟熟，就咁食已經好好食。 36個月伊比利亞黑毛火腿，夏威夷木瓜沙律伴青檸 平時食開風乾火腿多數配蜜瓜，餐廳改之為木瓜，配上鹹度稍高的黑毛火腿，木瓜食落更清甜解膩！ 荷蘭白菌忌廉湯 將白菌同忌廉打成湯，飲落很種菇味，仲食到菇蓉，面頭仲有數片白菌，好好飲！ 周打蜆肉忌廉湯 忌廉湯打得頗幼滑，仲有不少清甜蜆肉在內。 Cold Seafood Plate +$98 (French Oyster/Cherry Clams/Japanese Scallops/Rose Shrimp/Australian Blue Mussel) 小妹覺得呢個海鮮拼盤值得加錢食，海鮮的新鮮程度比想像中來得高。一份包括法國生蠔x1、玫瑰蝦x1、澳洲青口x2、日本帶子x1、鮑魚x1。 小妹無晒食到生蠔便不作評論，日本帶子食落質感軟嫩清爽，富鮮甜味，沒有過度雪藏的味道； 玫瑰蝦肉質爽口，連鮑魚的肉質都很爽彈，質感不會太乾和實。 法國鵝肝焦糖燉蛋配法國牛油麵包多士 $98 用了仿樹幹木盤盛著的小砵焦糖鵝肝燉蛋，連小木匙都印上店家名稱，賣相很得體！ 面層烤至焦脆的焦糖，底下係滑溜的鵝肝燉蛋，偶爾仲會見到裡頭有粒粒鵝肝在內。另附上6片法國牛油包多士，將燉蛋抹上多士上，多士咬落酥脆甜甜的，咀嚼中鵝肝甘香豐腴的味道慢慢滲出，仲有脆脆的焦糖增加口感。 只係加埋焦糖脆脆食，鵝肝味會無咁明顯。所以後期我地都撇開左脆脆，直接抹上鵝肝燉蛋，雖然未達至滿咀甘香，但味道還是不錯，好邪惡的食法，但真係啖啖滋味。 炭燒美國極佳級安格斯肉眼扒 (9oz)配紅酒汁 $398 每次食牛扒必叫五成熟，切開後可看到是帶粉色的肉質；炭燒過的肉眼扒，有陣淡淡的炭燒味滲出，肉質咬落頗嫩帶肉汁，肉香的表現還可以；而且配菜有蕃茄仔同薯仔片，頗豐富。 煎焗法國黃皮春雞卷大蝦配蒜片百里香汁 $338 將黃皮春雞卷著整隻大蝦再拎去煎至微微金黃，賣相可見到像雞腿型的春雞，但又見到大蝦尾，滿特別的！ 切開中間可見裡頭清晰的雞肉和蝦肉，還有層菠菜在內，真係咬落啖啖肉，口感豐富，配上蒜片百里香汁更加惹味！ 法式窩夫配楓樹糖漿、鮮果及雪糕 $88 賣相頗豐富的窩夫，切成三角形的窩夫一客四件，配上一球香草雪糕、焦糖醬和蜜糖，仲有點水果點綴。 窩夫屬於較薄身那種，咬落質感帶脆，富微微蛋香，食落沒有超實在的蛋糕感，食落較輕盈不至於很飽滯，喜歡加上焦糖醬食更加香甜。 最後來一杯飯後凍檸茶和Latte (+25)，想不到連Latte都有拉花，整頓晚餐都很滿意，相信未來要慶祝節日也會再訪。 ※本文以用餐當日的環境、服務和食物質素為準，口味亦因人而異，文章只作參考之用。 Chez Bistro | FACEBOOK、IG 地址: 銅鑼灣耀華街3號百樂中心21樓 (港鐵銅鑼灣站 A 出口, 步行約2分鐘) 電話: 3101 0321 營業時間: 星期一至四,星期日: 12:00-23:00 星期五至六: 12:00-00:00
