前陣子係網上見到屯門紅橋新開左一間日本丼飯店，賣相相當不錯，新開張仲有試業價優惠，短短幾個鐘篇分享文已經有數百個回覆。深怕之後會掀起排隊潮，二話不說當天晚上就去試試！ 原文網址: http://connie-hk.com/Sashimi-TM 由細到大都好少踏足屯門，紅橋更係大鄉里出城第一次去，井財街一帶更來多左不少熱門餐廳；好似元朗大熱沾麵店開出的「赤橋拉麵」，出名貓畫甜品店的「嘆甜品」，仲有早前爆紅要等數小時先有得食的「屯の大版章魚燒」，已經諗住唔夠飽的話可以順便溝貨（笑）。 晚上落住微微雨粉，第三日開業已經要排隊 (不設訂位)。由於餐廳只有約二十個座位，我地排第二都要等30分鐘先有位，其後食完出黎更係排晒隊要截龍，三国海膽飯更已一早沽清，可見網絡力量真係不能睇少！ 餐廳的簡約點綴和擺設 今次我地被安排坐吧檯位，可以睇住師傅一路剖魚，一面將不同食材放到飯上，都幾賞心樂事架。師傅一連整左好多碗壱の重丼，手法純熟又快手！ 餐牌上總共有六款丼：壱の重丼、弍の重丼、參の重丼、三国海膽丼、黑甕丼和赤甕丼（辛口）；另外仲有數款小食和沙律，比較特別有櫻花蝦苗炸豆腐、炸川海老和燒油甘魚餃等，價錢合理。 每款丼的刺身都有點不同，我倆都一同要左較為大堆頭的「壱の重丼」，可以一碗食晒多款刺身，岩晒心大心細的我們。 咁岩到我地時赤醋飯用晒，師傅話要再等上15分鐘，先上小食比我地。煙燻芝士，一碟兩片，煙燻過既芝士陣味食落好似煙肉，卻沒有過鹹，芝士味頗濃郁。 櫻花蝦苗炸豆腐 $58 一客三件炸豆腐，豆腐的外皮炸漿都沾上滿滿的櫻花蝦，咬落帶點酥脆的口感，裡頭的豆腐很軟嫩，陣陣濃郁蝦味，配上甜甜的醬油，好食啊！ 壱の重丼 試業價$168 (原價$198） （附吸物及冷鉢，試業期免收加一服務費） 丼飯配菜有牛蒡、日本酸薑同木耳絲；丼飯包括是日築地海鮮4片、海膽、吞拿魚腩、蔥吞拿魚腩蓉、牡丹蝦同三文魚籽，最重要既係無小妹至怕食既三文魚。 今晚是日刺身係深海池魚和黑立刺身，深海池魚咀嚼中的魚油香十足，味道好似食緊油甘魚，好好食，反之黑立刺身既印象不太深刻。 海膽、三文魚籽和蔥吞拿魚腩蓉是丼飯中不能缺一的組合，小妹每次一見到這組合就會好想食！ 一瓣瓣肥厚的加拿大海膽食落頗重海水味，能食得出鮮味和甘香的味道，質感綿綿的很滑溜，感覺是新鮮的；蔥吞拿魚腩蓉就略嫌份量較小，魚香味都較弱，如果可以加少許山葵拌勻可能會更能突出其味道！ 吞拿魚腩雖然明顯見到有筋位，不過入口還是滿咀肥美甘香，讓人欲罷不能！ 牡丹蝦好大隻，而且肉質鮮甜爽彈、好新鮮！ 壽司飯裡加左赤醋，所以質素會比較濕潤，醋味好夠，食落極之開胃！最尾仲有'碟'白昆布湯可解膩。 其實每款刺身的質素都唔差，食得出質感同味道唔霉頗新鮮，就係個飯比較細碗，男人食完未必夠飽，可能要去隔離食返個甜品或章魚燒喇。 ※本文以用餐當日的環境、服務和食物質素為準，口味亦因人而異，文章只作參考之用。 漁匠屋 地址: 屯門井財街21號協邦大廈地舖 營業時間: 星期一至日: 18:00-22:00
