一路都想開辦男生化妝班，原因係真係好想Happy Share我作為男仔化妝的心得。從來都推崇自然的我，好怕將人同自己化到好假同好厚妝。 完全無瑕既濃妝唔啱我，如果黑眼圈好深用厚厚遮瑕膏遮哂咪仲核突，有時甚至連墨，雀斑都選擇唔遮。 有時頂唔順好多街上既「粉樣男」，化完個妝好似打左層蠟，好膠好粉，有時個妝同條頸唔啱色，攪到好似帶左面具咁。加上好粗好深色的眼線，同膚色好大對比。雖然正常化左妝係好睇啲，但化完之後又比人覺得好濃妝同「乸型」（本人身為男生並非常討厭此詞語！） 比人話得多，又唔識解決，久而久之唯有唔化，繼續暴露自已的瑕疵。 傳媒大部分都只報導女生化妝技巧，而且大部份化妝品都為女生而設，（也當然男生化妝未夠成熟吧），因而男生只好將女生化妝技巧套入自己度，悲劇就此發生！ 兩星期前私底問下我面書的男生們，好想了解一下男生對學習化妝的反應。我開設了一個「潮男化妝試班」，轉發給二十多位男生們。估唔到反應咁大，除了試班能正式開辦外，還有幾位同學要求我再開班。 上星期六有三位首卒先參與，兩小時內教了化底妝，男生的輪廓，修眉， 簡單自然的眼線等。由於所有內容都只關於男仔化妝，所以每項都為男生度身而設。三位好多問題發問，由於全男班，當然會更投入同放膽去問。問得最多都係點修眉，咩步驟先，咩為之雜毛等等。另外點樣搵啱自己膚色的粉底液，因為最覺得化完會偏白好似面具。 點擊圖片放大 由於小班教學，所以可以每位都分析，而且我更可以暢所欲言，因為好少機會可以同人講男生化妝咁有共鳴。多謝三位上星期參與！因額滿而未能報既朋友，睇黎我要開多班啦！等我呀！
