繼上次出街揾到一間甜品店以杏仁為主題，今次再講吓杏仁。或者喺好多零食店都可以買到杏仁，好多味𠻹，又有鹹又有甜，選擇之多有時都令我覺得花多眼亂。以前好鍾意食某西洋品牌杏仁，之後就到韓國嗰啲有其他口味，如：蜂蜜牛油呀，wasabi呀，勁辣呀......因為我年紀大，想食啲比較天然啲嘅口味，咁點呀，原味會唔會唔好食？整又會唔會好麻煩呢？呢啲擔心係多餘嘅，試吓整就得啦。我都係靠全能嘅google search到一啲人分享嘅做法，我揀咗一個最easy嘅方法跟佢整，就係用焗爐焗，真係冇咩難度，懶人都可以做。材料係:生杏仁100g做法：用清水洗乾淨杏仁，攤平待乾，焗爐150°C預熱數分數，將吹乾咗嘅杏仁放喺鋪咗錫紙嘅烤架上，放入焗爐焗30-40分鍾，其間開一開爐三到四次翻動一下杏仁，觀察吓佢個顏色，等佢上色但又唔會燶過頭。焗好由焗爐取出，千祈唔好即時食，好熱嘅，俾佢rest吓，又翻動吓佢，大約半小時後，您翻動完佢佢唔發出滋滋聲，佢唔再熱，放入存氣嘅玻璃樽，或者保鮮盒。每日拎十粒八粒出嚟當零食，大概食到一星期，食晒又再焗過。
