乘騎時間:5:05:29 乘騎距離:84.06KM 早上起身之後就收拾行李, 準備出發 每次收拾行李都要用好長時間, 因為我到左旅館之後就差唔多拎晒啲野出黎 搞掂晒之後就退房落街 係樓下既一間小舖頭到食早餐 兩個包再加一大杯豆漿都係40蚊台仔 我買果時人地都準備收舖, 我就坐係到慢慢食阻住人收舖 BTW, 啲包係叫一粒粒的而唔係一個個 食完早餐就正式出發, 係條街到見到唔少單車友, 就揮下手打個招呼 踩左大約一個鐘左右就覺得熱到不行, 大佬而家仲係十點幾, 點解可以咁曬 見到有7-11 就狗衝入去買枝野飲, 坐低休息降下溫 台灣既7-11真係單車友既恩物, 入面有枱有椅可以讓人休息 而且都有wifi, 有啲揸電單車既人都會入去坐下 所以好多7-11入面都會有好多人係入面坐 係入面休息夠就再踩, 一出7-11門口就好似入左去個蒸籠入面咁 沿係台1 線繼續踩, 就可以去到下一個市鎮, 唔怕迷路 不過係條路上面都冇咩風景好睇, 所以都會幾悶 踩到黎呢到, 由於係新發展既區域, 所以條馬路好靚, 但係側邊就乜都冇 係馬路邊見到好多呢啲黃色既花, 都幾靚 再踩多陣就去到一條路, 側邊好多好似上圖咁賣植物既地方, 有啲好誇張成棵樹咁大, 就咁放係條街上面 踩到12點幾就肚餓, 見到有7-11就入去食飯, 雖然都有唔小食店, 但係都冇冷氣 所以又去探下7-11 買左條冰棍黎食, 見佢個樣成枝藍色咁好似好凍 但食落先知中伏, 好鬼難食 7 仔真係好鬼方便, 買完個叮飯就可以坐係到食, 又夠平 食完抖下睇下地圖研究之後條路要點行 好曬呀師傅! 好彩係馬路邊種左好多樹, 係樹蔭下面踩咁就涼啲 踩到上橋之後冇曬樹, 比太陽直射, 熱到痴線, 仲要係好長既一條橋 橋下有好多農田, 可能因為河邊既泥土比較肥沃, 所以種出黎既農作物就比較好 過左農田之後就係河流, 不過好似係唔係好多水經過 無窮無盡呀! 落完橋就停低抖下, 飲埋岩岩食飯剩低既汽水, 就繼續踩 遠睇以為樹上開花, 原來只是把花綁到樹上 在遠處就聽到好強勁既音樂聲, 不知道在搞什麼活動 踩近啲發現原來係個婚宴場地黎 座椅之類的東西都放到馬路上面, 野食係即場整, 所以連埋個廚房都係馬路上面 咁就拎左一條行車線去用 有一樣奇怪的就是, 場地前面有一個舞台, 上面有人跳鋼管舞!! 再加上強勁有節奏感既音樂, 又真係幾開心既..... 呢個工業區夠霸氣! 之後踩多陣又經過一條橋, 橋下面係一個鴨定鵝既養殖場, 經過上面就聞到好鬼臭 其實我見到有啲想食 呢啲好似一望雜草既野, 睇真啲先發現其實係蔗田黎 台灣好多呢啲叫人小心單車既路牌, 可見台灣對單車既政策都唔錯, 而且係台灣踩車都好安全 菠蘿田, 見到有咁多菠蘿就好想食 踩踩下見到咁樣好宏偉既野, 之後之知原來係文化館之類既物體 係4點幾左右就到左嘉義, 之後目標就要去搵旅館 係呢啲咁既小街小巷入面走黎走去就好易會迷路, 過左十分鐘就唔知自己去左邊 慢慢周圍踩下睇下會唔會有旅館可以住 搵左幾耐下都唔見有, 就開番個地圖黎搵火車站, 通常火車站附近都會有 就算有地圖, 我都搵左好耐下先見到火車站 跟住就搵左間睇落比較便宜既旅館住, 600蚊台仔一晚, 都算幾平 係到住兩晚, 聽日休息日, 去阿里山行下 間房都算係咁, 而且又有wifi 可以上網 沖完涼換好衫就落街行下, 搵野食 一本道專賣店!!!!!! 今晚又係是但買啲野食就算 係呢到夾一樣野做代表, 之後就會有人拎去炸 我一開始唔知就係咁夾, 個店員同我講我先知 呢到仲有打奇棒食, 不過伏味濃就冇買黎食 台灣既真係好飲過香港好多 買完就拎番上去自己毒係房入面食 踩完今日之後, 全身冇衣物覆蓋既地方都曬傷左, 個鼻曬得最傷 就算用左袖套, 對手都曬到好痛 PS: 係馬路上面有好多比人轆死既小動物, 今日見到隻新鮮既老鼠, 十分嘔心
