乘騎距離: 118.54KM 台北>頭份(苗栗縣) 乘騎時間: 6:49:35 今日上午7:30 就起身, 好健康既生活:) 今日既目標就係沿住台15 線行 問下旅館個老闆娘大概應該點踩, 就出發了 出左旅館就要諗方法去到台1 線, 行呢條線可以去到台15 線 踩到馬路上面, 第一個感覺就好~~多電單車呀! 大多數都揸得幾快, 好可怕 由於台灣既街道上係極少路牌, 所以我好難搵到自己個位置到底係邊到 而手機個GPS 定位要好長時間, 我廢事等就直接踩左先算 踩左陣見到個警察抄緊牌, 就去搵佢問路 佢:「你在旁邊等一下」 跟住佢抄完牌就無視左我, 去左指揮交通....... 咁就唯有食自己, 睇下個地圖細心啲搵下, 再加上男人既第六感就出發 迷左一陣路之後發現呢個平平無奇既路牌, 代表我踩到去台一線了 見到既時候興奮到大叫左出黎 踩左陣就去左一條好靚既橋上面 橋上面仲有單車徑可以踩, 十分安全 影完相之後, 就去向踩橙色車既叔叔問路, 結果佢都係唔知道, 仲問番我係咪去淡水 果架橙色既單車係台灣既Ubike, 由政府營運, 係街上面有好多租車同還車既地方 只要用悠遊卡就可以租用, 俾市民同埋遊客租黎踩去唔同既地方 十分好既一個政策, 相對香港政府就........ 呢個廣告夠霸氣, 出動到自由神像, 段文字都幾有意思喎 踩多陣比我發現到呢個路牌, 開心到要跳隻舞賀一賀佢 今日基本上只要沿住呢條路踩就冇問題 沿住呢條台15線踩左陣, 就開始落狗屎, 拿拿林搵個地方避雨 有個好心既大叔經過, 帶左我去買便利雨衣 不過著左之後好焗, 過左陣就冇著了 踩踩下見到呢啲好溫馨既提示, 不過我冇需要就冇去休息站 再踩多陣就黎到海邊了, 呢個時候已經變成毛毛雨, 比較舒服 低頭時就會見到這個畫面 飛機降落桃園機場時就可以見到踩緊既呢條路 到達桃園縣了, 踩到呢到就開始好肚餓, 但係附近都冇野食 踩多20幾分鐘就去到一個小漁港, 果到有好多野食 企左係間店舖門口諗下應該點放架車既時候, 有個大叔店員就話幫我睇車, 極好人 入去間舖時見到隻好得意既狗仔 等野食到既時候就同佢玩 叫左個雞肉飯同個蚵仔煎, 非常好食 出發之後就唔知點解踩左上去台61線, 不過都差唔多, 所以就冇理到 路況唔錯同埋都幾平坦, 不過由於只經過工業區, 都冇咩景色好睇 等紅綠燈既時候發現側邊個水坑入面有極多蝌蚪, 旁邊就係垃圾堆, 生命力真強 踩多陣就遇到踩單車最怕既事......就係比狗追!! 嚇到我痴線, 即刻加速逃跑, 好彩隻狗只係追左一小段就冇追 之後係路上見到狗都會十分害怕, 然後就小心翼翼咁兜遠啲避開佢地 係61線踩左個幾鐘, 好悶冇咩景色睇, 但係條路好好踩, 好平坦 唔知點解呢到封左一段好長既路, 唔知做緊咩工程 另外, 條路就係咁一直延伸, 好似冇盡頭咁唔知幾時先踩完 路上又冇補給, 踩多陣頂唔順就轉左去台1線到踩 呢個時候又開始落狗屎 拎個密實袋裝住部相機唔好淋濕, 所以之後都冇乜點影到相 中途經過一條半開放式既隧道, 好彩側邊有電單車專用道, 唔洗同大車爭路, 所以都比較安全 順帶一提, 台灣大部分既路都會劃左條線係電單車專用, 基本上係上面踩單車就好安全 因為唔會有汽車係上面行 再踩多個幾鐘, 就到左個新竹, 打算搵旅館住 最後搵到既旅館都幾貴, 又唔可以放埋架單車上去 然後就決定再繼續踩, 去下一個市鎮再搵地方住 踩多20幾公里之後就到左個叫香山既地方 問下個雜貨店入面個大嬸有冇旅館, 佢話呢到附近都冇, 叫我去附近一間教會入面住 同佢講我係香港自己一個黎台灣環島, 佢就超級驚訝, 係咁話我係咪痴左線 我諗自己都應該有啲痴線先會咁做 去左間教會去睇下, 不過好似關左門, 就冇去問可唔可以住 如果可以試下係教會入面住都係個幾特別既體驗 聽講好多環島既人都會係教會入面訓 再去問下個賣魚既大叔 佢同我講要踩番轉頭去新竹, 咁樣會近好多 不過踩多十幾公里就可以去到下個市鎮, 果到大好多, 應該可以搵到旅館 我先唔會踩番去新竹, 然後就繼續踩 踩唔夠兩分鐘就開始上山, 呢個時候我已經踩左百幾公里, 仲要踩上山等於攞我命 無盡既上斜呀!! 好彩呢個上斜唔係好長, 連續踩十幾分鐘之後就到頂 落斜之後踩多陣就頭份鎮 係到搵到間只要500蚊住一晚既旅館 老闆娘跟我說:「你們騎車的都是住便宜的房間吧」 之後就比左間500蚊既房我住 入到間房, 好似70,80年代既佈置咁點擊圖片放大 房間出面條走廊, 好懷舊啊~~ 沖個涼就落街搵野食 台灣街上極少垃圾桶, 但係條街都可以保持到好乾淨 另外, 毎日定是都會有垃圾車到區入面, 仲會好大聲咁播音樂 居民聽到就會音樂聲就會拎啲垃圾出黎扔, 唔似香港咁有垃圾站 落街又唔係幾想食正餐, 就是但買啲野番上旅館食就算 粉紅色袋入面果啲炸野極好食! 今日踩一日車, 皮膚好似已經曬傷左, 但係今日全日都冇出過太陽呀......
