啱啱個星期六入左仁川玩, 俾我發現左仁川其實都有好多野玩, 而且有種入長州嘅感覺, 有時間值得一去。平時少入仁川,最多去到富平地下街。 今次入係因為打算去見識果邊嘅海水浴湯, 同首爾一般用嘅唔同。海水浴湯係抽取200米下嘅海水, 含非常豐富礦物成份。係仁川嘅沿岸碼頭就有幾間海水浴場, 我哋就去左用原湯果間, 因為有啲係向原湯浴場買水, 基本上海水浴場係幾個鐘換一次水, 同一般汗蒸嘅有換水系統唔同, 而且裝修都比較古舊, 可能有人會接受唔到。以我試過咁多間浴場嘅經驗黎講, 水質係有明顯分別, 我個人覺得值得去。 沿岸碼頭除左有海水浴湯, 另外仲有個出名嘅魚市場, 係果度食海鮮絕對超值, 而且新鮮。以我哋兩個人量有2條鮮魚魚生、一個辣海鮮湯、一枝啤酒、另加堂食費都只係34000won = HKD300。由於近海, 有魚場, 所以比首爾嘅平同新鮮。我原本係打算買返去, 因為平出面一半, 但因為要坐車, 又有行程, 所以選擇堂食, 但乾貨就有買, 如章魚乾同雞泡魚乾, 都係比出面平。假日好多本地人去果度買and食。 之後出返去東仁川, 去左新浦市場行, 新浦市場出名醬炸雞, 去到晚上8點幾特別多人排隊, 而且幾乎都係韓國人, 我之前見啲blog都有介紹過, 因為太多人唔想排, 走去食其他, 我反而覺得有驚喜。我去左其中一檔食佢嘅炸魚輪, 見到時已經覺得好食, 而且又係抵食, 比出面大一半, 但價錢就一樣(甚至平啲)。咬第一口已經覺得好好味, 覺得自己好有眼光。我買時, 仲有韓國大叔預訂70條, 第朝拎貨, 我心諗你70條係咩事呀!!?? 最後晚餐搵左間中餐廳, 應該係中國人/ 朝鮮人開, 又係驚喜之選, 比仁川中華街好食同平, 而且同我食開嘅唔同。當初係見個辣海鮮面大大碗先6500won=HKD44, 覺得抵食而入去的, 我叫左個炸醬面, 同出面嘅味, 我buy佢嘅味! 食飽左沿新浦地下街行去東仁川站, 轉去富平地下街去, 但因為已經快10點, 有部份都閂門。 今次掛住食, 完全冇影到相, 但有機會下個月再去, 到時會影同大家分享。仁川景點, 我個人覺得好值得去。
