6/12/17 涼 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 17 旅程後感 第一次玩中國長線團,無諗到有機會去桂林呢啲山水風景之地.平時講起旅行都會即刻諗去外國,起碼要搭飛機既.最後因為慳錢而揀大陸團. 要講感受,首先就係好懷念Day 0果日,一夠鐘收工就拎埋行李,過關返深圳.果種收工即刻出發既感覺原來幾爽,好似賺多晚時間玩咁,不過就要事前做多啲功夫. 例如要著得casual少少,帶定對鞋返工,收工去換,又要專登拖埋行李返公司. 不過收工去搭車,以至返到大陸果段時間,心情真係無與倫比既.因為你會覺得,點玩都仲係Day 0,個旅程都仲未開始,haha,yeah!~ 隔左幾年再次住Airbnb,同SueSue一齊體驗民宿. 民宿同酒店個feel同玩法完全唔同,住酒店你會享受貴賓式服務,住民宿都有「貴賓式服務」,但就係房東的熱情款待,以及好親切的為你打點一切,又好樂意為你介紹佢屋企,令你有種家的感覺. 住Airbnb係有趣得意的經歷,因為你未入住前唔會知道果度實際係點,睇相片只幫到少少. 而且,每一間airbnb都可以話係獨一無二,有好有唔好,亦唔會預知房東或者其他住客係點,帶少少神秘性. 一間好的airbnb,係會令你留下深刻的印象. 桂林之旅,正如前文所提及,發生了唔少事,唔算係一個好美好的旅程.不過單純響我地自己黎講,都係玩得開心. 桂林同陽朔,對我地黎講,就係好多山石,一舊舊細細座,奇形怪狀好得意.加埋湖水,自己身處在湖中央,被兩邊的山包圍住,真正係山水之間. 同埋桂林風景靚,都不及陽朔,陽朔某啲面貌真係靚爆燈,可以話係將桂林擊倒.不過都無乜所謂啦,反正兩個地方都會去. 世界那麼大,今次來桂林一趟,下次再黎都唔知係幾多年後既事,唔知呢度將來會變成點呢? 因為我地已經見到呢度旅遊業既發展,已經開始破壞緊呢度既環境和面貌.十里畫廊,有啲明明好空曠,可以好開揚地欣賞連綿山脈的位置,都被用來興建酒店,一個個工地的圍封板block晒啲風景,我地坐響旅遊巴上層都被擋住視線.相信將來酒店落成,都只有酒店住客先享受到呢個美景.十分可惜. 趁青春留倩影, that's why我地咁早就黎遊覽呢度,都希望趁佢未被完全城市化之前,好好欣賞其比較真實的原貌. 旅行團中認識了好幾位團友,多數係中年夫婦,都係好nice好傾到計既,有啲仲係外國返黎架添,諗住玩完桂林又去第度玩,好carefree. 學Sue話齋,呢種緣份又係好奇妙,你一生人只會遇上佢地一次,之後大家唔會再聯絡,但有趣既係,大家又intensively響埋一齊玩左幾日.到底呢種叫相識定係過路人?...都好難答. 深圳就係一個好適合weekend輕輕鬆鬆玩一兩日既忘憂勝地. 無乜交通費,物價平香港一截,又方便,有野玩有野食有野睇有野行,再唔係去揼骨鬆一鬆又得. 深圳唔需要chur,唔駛一次過去勻所有景點,因為一次過去晒,就再無地方去,亦唔會再有incentive過去. 有時覺得,就算啲地方唔算好吸引,但只要係離開香港,就已經好滿足. 一來唔想留響香港呢個hell,二來係香港真係行黎行去都係果啲,都無咩好野睇,悶到核爆. 深圳比我想像中大得多,可以explore既似乎都唔少,遲下可以間中上去hea下. TeamLab光影展係正既,不枉我地專登spare半日時間去,係的確要去一次體驗下既. 另外海底撈真係幾貴,間中食下過癮下算,大陸都仲有大把又平又靚既野食,例如我地今次食既客家菜. 整個trip歷時五日六夜,時間比原定長,幾乎及得上我地既南韓之旅,真係無諗到返大陸玩都玩到咁耐. 將來再報團返大陸,就可能會揀一啲平價幾百蚊既美食純玩團,抵玩之選. 玩得都盡興既,開頭chur啲,行程緊湊,尾段就輕鬆番,完左個旅行團仲有一日響深圳俾自己buffer,先收拾心情第二日返工. 呢次桂林深圳之旅,都係一段難忘的回憶.今次拍多左影片,覺得有時影片睇既野更實在,更能重拾當時的記憶,希望大家喜歡. 點擊圖片放大 +4
