6/12/17 涼 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 16 旅程後記：愛生事家族 賤到核爆 話說今次join旅行團我地遇上一組為數十五人的麻煩家族,佢地其實人多到可以包團,但佢地又就咁當散客join團. 人數多唔係問題,但佢地唔似一般香港人,似係住新界鄉村果啲圍村人,講野粗聲粗氣大大聲聲,成班阿叔阿嬸全程嘈怨巴閉. 最頂佢地唔順係佢地一直掛住自己傾計,又唔聽領隊講解.明明人地一早解釋好高鐵座位分配事宜,佢地唔聽,然後上車先黎嘈住問點解要分開坐. 喂大佬呀,人地晨早講左車位緊張,兩位一組的團友都有可能要分開坐,領隊就更加無位,你地十五個人要打散坐有幾出奇呀? 領隊按照程序幫我地重新調配座位,佢地就話要跟番高鐵出票既果個座位,結果就搶走左其他團友座位,搞到有團友沿途去桂林果幾個鐘都無位坐,超自私只顧自己. 其實真係影衰晒香港人,佢地入上車嘈到高鐵開出後仲響度鬧緊領隊,成卡車人望住佢地.可憐領隊無位坐之餘仲要受佢地氣,真係一個唔好既開始. 上到旅遊巴,所有團友都怕左佢地,坐晒中後排,讓佢地坐車頭自high.佢地固然十分興奮啦,不斷高聲談天說地,最刺耳係啲大笑聲. 其實大家,包括領隊在內,對佢地都好忍讓,一直唔出聲.領隊都只係一次好客氣地勸佢地將聲浪收細,顧及一下車尾訓緊教休息的團友.佢地開頭就聽話,但好快又故態復萌. 終於去到銀子岩景點,因為呢個洞窟頗大,路程頗長,梯級又多,話說因為有一位主婦團友,佢腳骨力唔好,行得比較慢,結果遲左五至十分鐘上車,但呢班麻煩團友竟然出言侮辱,甚至講埋粗口. 於是領隊終於嚴正地向各位團友講出自己想法,不點名批評果班人的失德行為,又認為佢地話人地遲到,剝削左佢地權利時,又有無諗過其實自己都做過啲野係剝削左其他人的權利. 嘩真係大快人心,講中晒我地呢班可憐團友的想法,只係我地唔方便當面指責,要等領隊出頭.領隊講完果下,我地即刻拍手高呼：「好野！講得好！」 去到酒店又係好好笑,佢地一行十五人,已經包晒同層大部分酒店,好多團友慶幸唔係跟佢地同層,而我地偏偏係同層. 好在維也納酒店好寬敞,房間好大,走廊又闊,加上我地間房轉左彎屈左入一忽,所以隔音好好,聽唔到佢地嘈. 佢地真係可以響走廊叫黎叫去,因為佢地彼此唔知對方住邊,跟住就由走廊一邊,叫親戚個名叫到走廊另一邊,跟住行到中途時其中一間房有人開門,就大聲叫佢入房食小食.我經過見到真係笑出聲,lol. 佢地既衰野當然唔止咁少,再嚴重啲都仲有,嚴重到我不便在此透露.最無奈係啲女人同啲男人一樣咁賤格,你真係唔會明點解啲人會咁. 事件最後搞到我地桂林最後一晚響酒店無得休息,無得嘆世界,趕住用電話draft一篇信,陳述呢班團友所作所為,並證明領隊無辜. 事緣班友被領隊公開不點名指責後好唔順氣,其中一個阿叔落車後不斷指罵領隊話會投訴佢,之後上車成班人變本加厲,肆意高談闊論甚至唱山歌,擺明係刻意挑起事端,勢要同你過唔去. 領隊話無諗到咁簡單的桂林團會搞成咁,因為如果啲客勞嘈,走去門市發癲,公司無論如何都要將領隊暫時停團,直至調查完結為止. 所以領隊都預左要提早放假,不過佢更加擔心自己份工,驚要轉行.佢話仲有屋企要照顧,有阿媽要養,sosad. 其他夫婦團友好有心,好有義氣,覺得領隊因為呢班人而影響生計好不值,亦不屑佢地所為,所以呼籲所有人一齊寫信,交代番成個團發生既事,證明領隊無做錯,只係果班人衰先. 我地就係因為呢班麻煩人,搞到無得好好享受最後一晚.Draft完篇文之後,回程響高鐵上面寫番出黎,交俾領隊處理.唔知件事最後發展成點,希望幫到佢啦. (...係呀都未講完,到最尾我地高鐵深圳北站落車,有兩pair團友失散,唔知係咪無跟大隊用左另一邊出口,於是大家都響閘口等左陣,睇下領隊搵唔搵到佢地,都擔心佢地去向.但呢班鄉下佬就響度抱怨話唔想等,最後一支箭率先離開,真係自私到極點,我到依家諗番,心諗點解自己要同呢班低等動物一齊去旅行,lol.)
