5/12/17 晴 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 15 旅程後記:參加旅行團之好與壞 話說今次桂林深圳之旅可以用一波三折來形容,因為本身我地報左美麗華旅遊的四日桂林團,可以欣賞埋銀杏林,而且平平地幾抵玩. 點知一直睇個status都係寫住「快將成團」,好似遲遲都成唔到團咁.不斷打去美麗華客服,但CS都一直迴避我地問題,不斷講話旅遊業議會指引,旅行社只需出發七天前先須要作實是否成團,所以我地就算九日前問佢地都答我地唔到. 其實係低能既,CS無理由唔知個團收客情況係點,一plug個編號,應該show到有幾多人報左名,但CS就唔肯講,無論explicit或者implicit都唔答,直至Sue嘈佢先肯透露少少. 想講呢間野啲CS真係又廢又差,同埋佢揸住旅遊業議會條例,明明出發前九日仍只得五六個人報名,遠差成團所需的十五至二十人,但就死都唔肯confirm無法成團,焗我地stay響佢地公司,等到七日限期屆滿,就想我地轉join其他目的地既團,真係好狗. 所以果幾日,我同Sue頻頻撲撲,打去CS問,又不斷搜羅其他旅行社,睇下有無類似又成左團既旅行團,因為假期已經請左好難再改,如果真係無團的話,就要斬釘截鐵,轉場飛去其他地方例如台灣玩. 最後,搵到永安呢個純玩團,唔去睇銀杏,但就去龍脊梯田,都特別既.因為Sue想去桂林所以我地照樣報名,但就因為太遲報名所以少左少少優惠,真係多得美麗華唔少. 我想講,永安CS響資料透明度方面高好多,我就咁以街客身份打去問,都唔係要報團,佢地即刻就答左我唔同日子報名人數,完全唔會保密,所以我都難以理解點解美麗華響呢方面要守口如瓶. 所以,經此一役,我地會永遠blacklist美麗華旅遊,亦會呼籲其他人非必要唔好揀呢間,因為啲service真係好差. 亦提醒左我地將來報旅行團,都係揀啲再大型啲既旅行社,例如康泰永安呢種,比較受歡迎,成團機會大好多. 再secure啲,就係揀已標明成團的日子出發,咁就萬無一失啦. 今次係我同Sue第一次參加旅行團.可能大家都知道,join旅行團有好有唔好. 好就係全程唔駛plan,唔駛花大量時間google,同埋plan交通,食宿.(雖則我過往plan自遊行都好enjoy呢段過程既,不過依家返工真係少左好多時間搞) 另外對我黎講,跟團最正係全程有車接送,可以去偏遠地方,唔駛行又唔駛花時間等車或者搵路,響車上又可以放心瞌,唔駛驚落錯車.呢樣係最好既. 至於啲人話報團可以以低成本住到靚酒店,我諗就depends啦,因為我地今次係大陸,我見我地入住既準五星級酒店,房價都只係二百幾蚊,真係平到爛. 加上呢個桂林團除左基本團費,仲要俾導遊領隊服務費,同埋無諗到導遊會安排左咁多自費項目俾我地,所以實際上呢個團團費都唔平.只不過返大陸玩好似跟團安心好多咁. 至於跟團既弊處都有唔少,首先最大問題係要每朝早醒morning call,人都未醒就要仆出去上旅遊巴. 本身以為大陸團聽落好似得中年以上既人參加,suppose應該好hea,點知竟然朝朝六點半morning call,行程pack到實一實,chur到一個點. 最慘係你又真係見到啲團友咁鬼醒神,反而我地後生既就謝晒,真係好諷刺. 其次,旅行團好難做到所有景點活動都係你中意或想玩既,總有啲無乜興趣,但礙於跟團,最後你都會選擇跟大隊. 另外,跟團多數係同其他人坐埋一圍食團餐,開頭大家都唔熟絡,漸漸就會傾番幾句.反而係食物方面份量似乎唔多夠,飯係任添既所以實食得飽,不過餸菜就未必滿足到大家的食慾,haha. 仲有係果筆不明不白的所謂領隊導遊司機服務費啦,其實呢筆費用唔係應該本身就計響團費入面架咩? 我中意俾幾多tips佢地係我之後既事,真係唔明點解可以拆出黎計. 最後,就係跟旅行團的話你要同其他人一齊旅行,你控制或者預測唔到你會遇到啲咩人. 好似我今次呢趟桂林團,就遇到一組為數十五人的家族團友,超麻煩超乞人憎,不過就係後話了.