29/11/17 炎熱 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 8 Day 3 - 銀子岩/遇龍河漂流 食完農家宴,旅遊巴前往下一個景點,銀子岩.入場需配以耳機導賞. 銀子岩屬於層樓式溶洞,裡頭有不同鐘乳石,配以七彩繽紛的鎂光燈上色,產生一幅幅圖畫. 不過上年響濟洲睇過更加天然的洞窟,覺得呢度實在太人工. 首先洞內通道都修築得完好,幾乎無積水,完全唔似天然的洞窟. 另外周圍鐘乳石都有彩燈照住,睇唔到原色真貌. 最重要係呢度無法解釋地熱,明明天然洞窟應該好凍要著厚褸,呢度係一絲風都無,又焗又熱. 相信係園方已封死晒所有空隙,令洞窟幾乎完全密封,結果行到我地出晒大汗,上樓梯路段頗為辛苦. 搞笑係裡頭有唔少地方實在太熱,要插電開住風扇,真係頂佢唔順. 所以銀子岩其實真係幾伏,強烈建議大家唔好自費去,要睇洞窟去外國睇,中國的會gg. 反而銀子岩出面既市集仲多特色野睇,例如煨蕃薯,桂林錐栗子,艾餅,辣豆腐. 有團友好好人,請我地食桂林另一特產馬蹄,爽口又清甜. 點擊圖片放大 +42 下午三點半左右,我地去到呢個旅程我地印象最深刻的地方,我定為陽朔其中一個最靚之景,遇龍河. 遇龍河可以免費企響河邊觀賞風光,亦可以跟大隊一齊坐竹筏,呢個都係自費項目黎,不過呢一百蚊係值得俾既,因為帶俾我地一個極美好的體驗. 遇龍河竹筏漂流,六人一隻船,可以睇姑娘唱山歌表演,另外魚鷹表演捉魚.不過重點都係享受坐住竹筏睇陽朔的山水之間. 就咁睇相片,可能你未必想像到當時既氣氛同情景,但可以講,果一刻真係好寫意,你會覺得,專程遠赴而來,為左呢一幕景象,都係值得既. 可能係因為我地坐船鐘數合適啦,陽光猛烈得黎又唔係刺眼果種,光線照射落湖水反射,成個畫面都幾燦爛. 如果有興趣,團友都可以嘗試撐船,望落容易其實好難,要拎起咁重咁長既竹枝已經唔易,仲要借力去控制竹筏方向,真係紮勻馬落足力都未必得. 回程時經過魚鷹捉魚的地方,團友只要拍手夠大聲,魚鷹就會表演捕捉水中的魚,再交給漁翁,都幾聰明. 船程總共大約半小時,唔算好長,都算係整個桂林之旅最美好最難忘的時光. 遺憾上左旅遊巴先知原來可以去買相留念,仲要只係十蚊咁平,無買到實在可惜,唯有借團友張相影一影低啦. 點擊圖片放大 +34