23/11/17 冷 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 6 Day 2 - 魯家村/桃江豆腐宴/正陽步行街/灕江劇場山水間 話說由偏遠的龍脊返回桂林,響車上面都不自覺訓左大半個鐘有多. 旅遊巴來到桂林另一個景點魯家村,有一刻真係唔想落車想繼續訓,lol. 魯家村其實似一個普通鄉郊屋村,裡頭都係三層高的樓房,上層住人,下層做生意. 呢度無咩特別風景好睇,純粹當有個古式古香既庭園行下,同埋食下呢度居民整既豆腐花同煎豆腐. 兩蚊碗桂花味豆腐花,好滑又夠桂花味.其實已經唔算最平,本地人一定知道邊度食先最平. 煎豆腐都一樣咁滑,食完一碗再買多碗上車食,再買多包水煮花生添.不過先知中伏,因為無諗到導遊話下一站就食晚飯,喂大佬依家先四點八咋喎?! 點擊圖片放大 +26 結果真係五點鐘未到就開飯,真係人生第一次,難以理解佢地既安排,亦深深體會到join旅行團既bugs. 桃江豆腐宴,心諗剛剛先食大量豆腐黎,已經無乜食慾.但唔食的話今晚實瀨野,都係食飽左先,今晚再搵野食算. 呢度上菜好快,一下子上晒咁多碟餸連埋生果,大家可能都未有心理準備食飯,所以都食得好快,stay得唔耐就出番去上車. 因為都食得急,無特別幫啲餸菜影相,不過你預跟旅行團的話,其實只能淺嘗. 點擊圖片放大 +2 不過咁早食飯係有原因既,因為我地要提早到市中心果邊,導遊推介我地睇晚上七點半開場既灕江劇場山水間. 六點半後經過桂林中心廣場,來到中山路及正陽步行街.嘩呢度好大好多野睇啊!~ 我地呻笨,點解今晚黎睇呢個架,呢條半行街實在好大好長,好多野食,好多商店,好多特色野睇. 40分鐘,扣埋去肯德基搵廁所時間,根本唔夠時間行. 雖然飽飽地,但一場來到,唯一機會逛呢條街,如果唔試下呢度既野食真係對唔住自己. 幸好spotlight到呢間岩燒乳酪,於烘麵包上面加一層芝士,以為好油膩,食落又有種淡淡的檸檬清香味(可能係芝士味黎),唔算好滯.實在太好食,所以返轉頭買多塊,haha. 周圍仲有好多小食,串燒果啲,呢個夜市實在好熱鬧,亦相信係桂林居民消遣的主要地方. 我地另外買了燒魷魚(唔係好抵食),同埋充滿民間風味的手造桂花糕(口感好似蛋糕或者鬆包),就趕去睇山水間. 點擊圖片放大 +36 山水間,旅行社定義為《夢幻灕江》馬戲芭蕾舞.我地揀選呢個,而唔揀更加著名的「印象劉三姐」,係因為響youtube睇過印象劉三姐片段,好似好悶咁,似係啲文藝野我地後生仔唔會識欣賞,同埋250蚊人民幣真係貴左啲,所以二揀一,睇下桂林既馬戲表演算. 而結果我地揀山水間都無揀錯既,150蚊睇到馬戲同雜耍,其中一幕空中飛人,因為觀眾席同舞台好接近,個特技員真係響正我地貴賓席頭上飛過,真係睇到嘩嘩聲,拍爛手掌. 另外呢度都有電單車籠內轉圈,不過無乜高難度動作,反而值得一提係團隊裡有一個女車手,好型棍. 點擊圖片放大 +24
