23/11/17 冷 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 5 Day 2 - 龍脊梯田/壯鄉民俗宴 一大清早六點半morning call係咩玩法,七點鐘早餐,七點九集合出發,早到hihi,心諗我自己plan行程再pack極都無咁chur,lol. 第一次住內地的酒店,無諗到酒店早餐都實在頗為中式,食包點,粥粉麵飯,最特別的就係廚師即煮熟的桂林米粉,自己再加配心儀的配料及湯底. 因為集合時間實在太早,都無法慢慢閒情逸致地用餐,急急腳食多片西瓜就趕落樓上旅遊巴,費事遲到. 之所以咁早起行,因為今日我地要去既係山長水遠的龍脊梯田.果度係壯族及瑤族人生活區域,會見到少數民俗. 因為無做定research,唔知原來梯田咁偏僻仲要響高山山頂,結果我地兩個都著唔夠衫,落車果下都幾寒下. 梯田係遠到首先由桂林坐兩個鐘頭車去到龍勝,穿過瑤寨到龍脊山腳,再搭半個鐘園區專車上山,九曲十三彎,已經唔知自己身處地勢有幾高. 而且呢日潮濕霧氣重,基本上響山路望出去都係白茫茫一片,心諗都幾危險,點解我會黎左呢度,有咩意外點算. 唯一慶幸係呢度都仲有手機網絡覆蓋,反而坐高鐵果陣有某啲路段係no service. 坐左一大輪車,終於去到民族村可以行下.響門口已經見到綠油油的梯田了! 沿斜路慢慢向上行,兩旁都係民族特色商店或餐廳,亦有出租的平房,其實望落個樣都唔知點稱呼呢種住宿.又唔係酒店又唔可以用賓館來形容,最正係佢根本無開門,黑媽媽,都無人幫襯,唔知起黎做乜. 導遊話一路跟七星伴月觀景區方向行,就可以上到最高瞭望台.我地同一對長居比利時的香港夫婦一路拾級而上,攰到想放棄,終於花了四十分鐘先見到終點. 唔好以為四十分鐘好短好易行,我地一直行緊斜路同梯級,都幾陡峭下.同埋你無expect到suppose輕鬆既桂林山水團竟然咁chur要行高山,但一場來到,唔上去睇又有點可惜,都係硬著頭皮繼續上. 上到去,其實都估到,一片白朦朦,因為早上實在太大霧了,根本連梯田都未睇得清楚,遑論遙遠的七星伴月山嶺. 但可以完成呢個海拔828米的checkpoint,都係開心同值得慶祝既,所以我地都同果對夫婦合照留念. 識路上山,諗住可以跟原路落番山,但發現係唔成功既.因為上山時經過太多分岔路,好容易就行錯. 好在我地行另一邊路都順利落番山,去到山腰午飯的地方狀香樓. 呢餐旅行社叫做少數民族風味餐,壯鄉民俗宴,可以品嚐響呢度居住既人佢地既家常小菜. 其實味道係ok既,不過for一圍檯十人,餸菜份量較少,而且山上無乜肉類,都係蔬菜為主,對於剛行完山需要補充體力既我黎講,只係剛剛夠飽. 但overall呢餐算係成團最特別一餐,身處少數民族部落,食當地人既食物,係別有一番體驗. 落番山果陣已經過左中午,陽光漸強,霧氣亦隨之消散,相信依家既梯田會更加靚,山頂能見度會更遠,有更好風景. 上番旅遊巴,再坐番兩個鐘頭車,返去桂林.呢半日好chur,實在太累,不自覺地響車上訓著了. 點擊圖片放大 +107