23/11/17 冷 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 4 Day 1 - 韓燒自助餐/東西巷/逍遙樓/維也納酒店 日間只係去左兩江四湖一個行程,就要去食晚飯了. 大部分旅行團唔知點解都會設計一餐dinner為任食韓燒,可能因為市內有某一兩間韓燒店特別平掛. 我地黎到呢間,見到門口走馬燈寫住每位58蚊,心諗真係平到一個點,唔好旨意質素高,尤其大陸既野更加信唔過,我就但求餵飽自己架啫. 呢間鋪似乎做旅行團生意居多,散客寥寥可數,如果無團體幫襯,都唔知一日做得成幾多生意. 不過返到大陸,你會發現其實好多食肆都無乜人幫襯,唔知係因為地大物博定咩,街上食肆真係好少可會坐滿人. 揀張靠窗既檯坐,張檯痴立立既,嚇到唔敢掂張檯,笑左. 野食方面,肉類款式多,但唔係好新鮮.醃製既肉就太重口味,都係燒番普通急凍肉算. 而且大陸人缺乏衛生常識,任由啲食物外露,見到熟食上面有烏繩飛來飛去,想食都唔敢攞. 所以呢間整體黎講其實都幾差,唯有諗,旅行團係咁架喇~ 點擊圖片放大 +14 食飽就去行夜街,參觀東西巷一帶設計得古色古香的步行街. 夜晚燈籠高高掛,我相信日頭黎呢度都會幾靚既. 我地響呢度預先買定一大袋桂花手信,聽店員講先知原來桂林出名桂花. 如果我地早一兩個月來桂林,就會見到周圍桂花樹聞到陣陣清香桂花味. 買左桂花糕呀桂花糖桂花蜜等等,團友見到都覺得誇張. 其實唔係好多時間逛,好在呢度都唔算大,商店性質相近,所以來回行一圈都睇晒. 臨走仲去買桂花豆腐花同埋桂林米粉諗住返酒店食添!好為食~ 大隊集合上車的地方叫做逍遙樓,唔清楚有乜歷史,但夜晚發晒光就好有氣派. 可以上塔樓參觀的,但我同Sue行完東西巷都無時間,同埋覺得上塔都無咩特別風景可以睇到,反而響塔下影相仲實際. Join呢個團比自己心目中預期玩得夜,我地好似差唔多十點先返到酒店. 第一二晚下榻的是維也納酒店(高鐵站店),呢間係連鎖酒店黎,響國內間唔中會見到一兩間響左近. 大堂唔算十分大或者grand,不過上到樓上,見到咁闊既走廊,就知自己住左間靚酒店. 呢度係準五星酒店,房間靚又新淨,但散客價錢只係二百蚊晚,真係抵到爛.可能係因為佢近高鐵站,唔近市中心,性質似機場酒店,所以價錢較低. 沖完涼,即刻食我地買番黎既宵夜先,桂林米粉乾拌其實幾辣,我中意食桂花味豆腐花清清地甜甜地多啲. 點擊圖片放大 +38