21/11/17 冷 桂林深圳之旅 2017 Sue & Raymond 9 - 14 Nov 2017 #thesweetestcoupleinguilin #thesweetestcoupleinshenzhen Episode 1 Day 0 - 福田石廈 Airbnb / 占美茶餐廳 之前間唔中聽見啲打工仔去旅行係朝早拖定行李返公司,然後收工直接去機場搭飛機,心諗為左多半日時間響外地玩你地可以去到幾盡. 終於,今次輪到我地要咁做,並唔係因為我地想chur,而係為著旅行社成團問題而逼不得已,詳細會響後記再講多啲俾大家聽. 我地稱呢晚為Day 0.六點零鐘提早收工鬆人,坐火車到落馬洲福田口岸,關口唔駛點排隊幾好. 過左關就直接落去搭地鐵,深圳地鐵站實施安檢,每次進入車站都要先將行李過X光機.你可以話安全,同時亦可以話麻煩. 深圳地鐵車廂及大堂整體好新淨及光猛,加上有部分線路係由港鐵營運,所以管理相當唔錯,標示跟香港鐵路格式相近,十分清晰. 同埋可能因為多香港人往返深圳,月台及車廂廣播都會有廣東話聲帶,兩文三語齊晒,唔怕聽唔明指示落錯車啦! 點擊圖片放大 +3 我地今晚要入住既係位於石廈站附近的Airbnb,類似上次番禺經驗,都係處於一個屋苑小區內某棟樓的某個單位. 不過上次番禺係private room,即係成間屋霸晒.今次就住share room,即係跟房東及其他房客住同一間屋,獨立睡房,但其餘客廳,廁所,廚房都係share. 今次選擇得好,房東好好人好熱情,響樓下接埋我地上去,屋內打理得乾淨,裝飾得好靚,同埋有個corner供入住過既人留言,都幾有意思. 可惜我地第朝一大清早就要走,太匆忙都唔記得拎張房東送既postcard走,可能遲下再寄番張香港既postcard俾佢留念啦. 點擊圖片放大 +6 其實要咁急夜晚收工就過黎福田留宿係因為我地既桂林旅行團聽朝八點半就要響福田口岸集合,所以想預先響附近過夜,聽朝就唔駛咁早起身,拖住行李逼過關. 不過因為要check in民宿,好客的房東又同我地傾左好耐計,介紹左好多野俾我地知,結果搞得黎出去搵野食都九點幾. 天黑又唔熟悉石廈呢個住宅區既路,搵地方食野搵左好耐,想食果間又打烊,結果捱餓再行遠少少,去食房東推介的另一間港式茶餐廳. 其實呢間占美茶餐廳個格局似香港既燉奶佬或者翠華啲friend,但就有大量不同種類野食,價錢有高有低,適隨專便. 最抵食叫碟頭飯可以廿幾三十蚊就得,我地食小菜就貴少少要五十蚊水平,但都平過香港食. 但甜品或者特色野飲就明顯較貴,好有趣,你揭揭下餐牌,會睇到當中好大的variation. 而最勁既係,佢又唔會因為太夜而售罄,可以即刻煮到野食俾你,真係估佢唔到. 我地點左個風味豬手,豬油炒菜心,豉椒炒蜆,另外再叫盅川貝海底椰瘦肉燉湯. 可以話咁多樣小菜都好食,豬手雖然冷盤但香口,好好送飯. 菜心好大棵,第一次配以豬油食,味道特別. 豉椒炒蜆上檯時見無乜肉食,但愈食愈有,原來沉晒響底,份量仲多過響香港食,抵食到爛,有驚喜. 川貝海底椰湯都味道濃郁,吸收晒湯料的精華,一飲而盡. 食到飽飽再慢慢步行返小區,都差不多十一點了.盡快梳洗後就入睡,迎接今次旅行第一天正式開始! 點擊圖片放大 +11
