31/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.14 捷克克羅地亞之旅後感 (Raymond) 我同Sue期待已久既東歐之旅,終於成功實現出黎,並順利完成. 唔計坐飛機同響杜拜,我地實際玩左捷克兩日半,克羅地亞四日半. 捷克係唔夠玩既,有少量plan左想去既地方最後無時間去,重點的舊城廣場,亦只能夠響一個疲倦的狀態下草草遊覽. 克羅地亞就幾唔錯,去左好多地方,係差一個叫Zadar好靚的城鎮,我同Sue都期望將來可以重返Dubrovnik,到時希望再去Zadar. 今次旅行有唔少感想都已經響遊記提及左,所以來到總結,general地講少少或者recap下啦. 因為今次去既國家唔多,只有兩個,亦正因為剛好兩個,我地不期然會將兩個國家比較. 先講當地人,東歐人的確如一般認知的,比較高傲,唔多想理你果種.連一個師奶都從佢個樣睇得出果種戰鬥民族的特質. 不過又唔須要擔心既,黎呢啲地方,只要做番自己就得,對住當地人保持笑容有禮貌,佢地就算心入面唔想,但都會睬你既. 反而,去到克羅地亞,唔敢講當地人友善熱情好多,但明顯睇得出分別,起碼我地響街上行,路邊有啲坐住響度乘涼既阿叔,都會主動同我地打招呼,而且從事服務性行業既人都serve得開心同熱情得多. 同埋前排世界盃,大家都見到克羅地亞有幾勁有火拼,力爭上游到決賽,可惜欠缺運氣,輸兩球無謂波俾法國只能得亞軍. 不過因為佢地既熱血,令世人留意起呢個國家.原來克羅地亞係歐洲窮國,1991年先獨立成國,九十年代仲處於內戰混亂局面.而克羅地亞國家隊足球員,都係經歷住呢啲戰亂長大,你真係想像唔到,經過廿年後,佢地成為國際舞台上的王者. 而且國家打入決賽,全國國民好似發左達咁,就算與冠軍擦身而過,佢地都好似嬴左咁,歡迎國家隊隊員回國時,個場面墟陷到一個點.你會見到呢個國家既人有幾熱情及可愛. 捷克同克羅地亞另一個明顯分別係遊客方面,捷克有好多韓國遊客及旅行團,當然大陸人都唔少,但韓國都好多,因為國家之間簽左友好條約. 基本上,捷克已經完完全全成為一個亞洲人會去既旅遊城市.所以,除非你走上山,或者偏遠少少的景點,你預市內絕大部分地方都係勁多人,想影靚相並不容易. 至於克羅地亞,我地就見到啲日本遊客,但佢地似係自己自遊行來遊覽,唔似跟團既.似乎佢地真係有了解過呢個國家,對呢度有興趣先會飛黎遊覽. 另外響呢度真係見得好少亞洲人,甚少大陸人,而著名景點地方係有見過香港人既,但遠遠比預期少.所以,值得大家趁佢淪陷之前去遊覽既. 睇落我好似係咁踩捷克,褒獎克羅地亞,其實我都幾中意捷克架. 捷克對我最大既感受係佢每一座好靚好有藝術風格的建築,色彩好colourful,完全反映著歐洲的人文氣息. CK小鎮亦都係今次旅程其中一個最大收穫,童話般的畫面,永遠都會深深印在我腦海中. 另外唔知點解,我響捷克只有兩日半,時間唔算太多,但反而感受或者體會係較多,對我黎講,好似呢度會比較impressive,同埋remarkable啲. 可能因為捷克遊覽的地方較少及集中,而克羅地亞分散左幾個城鎮,同埋每個鎮所見到既野,風格上其實大同小異,都係一個散發住歷史的舊城區,所以睇完一個又一個,睇埋咁amazing咁正既Dubrovnik,最尾去到Split,已經睇到無乜感覺. 今次旅程成功挑戰響無自駕遊的情況下,一手一腳靠公共交通自遊行. 計劃行程時,發現長途巴士係有既,而且有啲路線都幾多班次可以選擇,我地乘坐果陣都見有唔少本地人搭,仲試過一次多人到超載,要個短途客企響車廂. 不過都好,好在係叫佢企,而唔係趕我地呢啲長途客落車.因為我地響巴士訂票網頁見到有人留過言話,因為訂飛時只係當你買左果個班次既車票,但無reserve過果班巴士的座位,結果佢坐車途中因為爆滿,司機竟然趕左佢落車,要佢搭下一班,lol. 其實你諗真一層,件事係唔logical既,因為我本身乖乖預先上網俾錢買車票,咪就係要secure我個座位咯?!...book左呢班巴士,但又唔hold你個位,係咩玩法,lol. 所以我book巴士果陣其實都好擔心,好驚到時真係會多人,唔知點算,而且我仲要買三套車票咁多添. 好在end up有兩程車都唔多人坐,而多人搭的一程,就係後上的短途乘客就咁企響巴士入面,就係咁樣解決件事. 響歐洲搭巴士transit,唔係唔得既,但最好係往返城市,即係周邊有多啲配套既地方.例如十六湖呢啲地方就唔太適宜,因為佢個巴士站響正一條荒蕪公路上,旁邊連一條行人道都無,你只會有一個方法去到果個位. 如果你住響巴士站附近當然無問題,但如果唔近,你就可能要兜大圈,甚至好艱辛地穿過深山野嶺,先可以去到巴士站...如果識渣車,呢段其實只係一兩分鐘的車程. 大概就係咁,返港後計番數,今次使費同跟旅行社的東歐團roughly差唔多,不過旅行團就可以8日或者10日去到幾個國家. 去多啲國家,感覺上好似抵啲,但明顯只能走馬看花地參觀,同埋只能去最出名的景點.例如捷克,你唔使旨意去CK. 所以,我地用同等價錢,可以較為深度遊呢兩個國家,係另一種玩法及體驗. 最後,多謝Sue的idea,同埋陪伴我一齊完成呢個歐洲之旅.第一次踏足歐洲,係美好的回憶.