13/7/18 雨 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.12 拖行李行恐怖山路/40分鐘chur盡首都Zagreb Day 8 - 9 June (Sat) 克羅地亞之旅最後一日,因為半夜落過雨,一朝早仲係潮潮濕濕,我地拖住行李,山長水遠由Villa Mukinja,行去十六湖二號入口巴士站. 嘩呢程就真係不得了.我地首先行上斜坡,先到尋日果條聲稱有老虎的恐怖樹林小路,又係靜幽幽既,不過已經唔輪到我地驚,我地反而係擔心行得太慢趕唔切搭八點半既巴士多啲.事關朝早只得一班返Zagreb,搭唔到就GG,連香港都返唔到. 今次嘗試搵條易行啲既石屎路,盡量避免泥路沙石路,因為山路嚴重拖慢我地步伐,而且係拉得超辛苦,又驚行李個轆碰撞得多會爛. 完全係汗流浹背,chur到核爆,呢一段係我plan行程時最大擔憂,亦係最後之大佬.段路話長唔長,話短唔短,但如果係拉住行李黎行,多一秒都嫌長. 行出幽靜樹林,去番十六湖園區外,又要搬兩件行李上樓梯,行番出馬路,終於到終點喇喊出黎!!! 好在我地預夠時間八點鐘就出門,真係要用廿幾分鐘先黎到,但明明駕駛路程只需一兩分鐘,sosad.同埋好好彩無落雨,否則真係唔知點算,一定狼狽得很. 其實要步行,除左行森林山路,仲有alternative既,就係下策,直接行公路. 公路就平坦得多,唔駛走上走落,又無沙石,拖行李都舒服得多.不過公路彎路多,只有好狹窄的路肩,唔會有行人路,因為根本唔預有人行. 網上建議都係行樹林,因為公路實在危險,驚車輛轉彎時無留意,有碰撞就唔好. 點擊圖片放大 +7 巴士準時八點半前到站,二號門口巴士站唔係好多乘客,一號果邊多啲,好快就離開十六湖了. 值得一提,呢一帶郊區既巴士站好興整一間矮矮細細的啡色木屋仔,但唔知整黎做乜,響入面企又唔係坐又唔係,只能當匿下,真係唔知做乜. 我地響車上食番前一日響超市買既三文治,仲有布甸又桃茶,簡簡單單填飽個肚,沿途欣賞克羅地亞的風景. 呢一趟巴士就短程啲,大概兩個鐘就到克羅地亞首都薩格勒布 Zagreb.呢度堪稱為全歐洲最唔吸引的首都城市,可能因為無靚/特別的景點,而且好細,同埋真係無乜特色. 不過我覺得呢度相比之前既Dubrovnik,Split,係幾有首都的感覺,亦真係算係個城市. Zagreb都係有tram既,似布拉格,個網絡覆蓋都幾廣,不過呢度更加得意既係全部tram都係藍色既,好可愛. 巴士一落車就見到行李寄存處,我地因為有唔夠個半鐘既時間響Zagreb遊覽,所以先放低行李響呢度.短暫寄存收費係每件行李每小時5蚊克朗. 即刻衝出去對面等tram,因為我地時間倉卒,依家已經過左11點鐘,但target係12點鐘響上城區坐番tram返黎大站,以趕及坐12點半開出既airport shuttle.而每程tram係需時十幾分鐘,即係話我地實際只得大約40分鐘遊覽Zagreb上城區. 點擊圖片放大 +19 11點08分登上6號Tram,克羅地亞呢邊交通方便好多,可以上車跟司機買票,而且司機個面容係和善好多,可能佢地都係他他調調果啲. 11點20分落車就係Ban Josip Jelačić Square,上城區的中心廣場.又係好多特色建築,又有碉像,而且好多人. 其實呢度俾我地既感覺都幾好,個氣氛幾熱鬧,幾集中,而且你見到周圍啲人都係開心既,遠處又有派汽球,又有booth派野,總之幾熱鬧. 我地俾一排紅色遮頂既市集吸引,所以行入去睇睇,原來呢度就係我plan去既Dolac Market.呢個market愈入愈大,裡頭仲有個魚市場添. 攤檔賣各式各樣既貨品,比較特別既係賣一棵棵既薰衣草,就咁買一棵真係第一次見.當然仲有唔少薰衣草產品. 行出市場,就係一座靚靚地既教堂,都係地標黎,札格瑞布主教座堂 Zagrebačka katedrala. 再響裡頭既餐廳區遊走,行上少少,穿過Stone Gate,就到著名的景點,聖馬爾谷教堂 Crkva sv. Marka. 呢度特別在佢屋頂,左邊係克羅地亞王國徽章,右邊係Zagreb市徽,都幾有標誌性,亦係我地之所以專登chur搭車過黎上城區既原因. 差唔多中午12點,原來會有步兵操練,但我地等唔切觀看了,要急急腳返番落中心廣場,搭番tram返巴士大站了.剛剛好40分鐘鬆啲,完成埋我地最後既checkpoint. Zagreb一如所料係好細同埋無乜花時間行既景點,40分鐘雖然趕趕地,但如果走馬看花咁玩呢個城市,一個鐘就係夠晒有餘. 話說Tram其實途經下城區,呢一帶有幾個好大既公園,如果開三腳架影相應該幾靚.另外亦有幾座優美的建築,奈何唔夠時間落車影相了,只能用肉眼欣賞吧. 返到大站,輾轉搞一輪先搵到airport shuttle既位置,克羅地亞人好好,就算英文麻麻地,都好樂意用肢體語言教我地路,真心覺得呢個國家既人比捷克人好好多. 次次回程都係滾水漉腳,趕死趕命,但往往都有驚無險,上得切車,haha.巴士又係好快既,半小時已到機場. 點擊圖片放大 +52