11/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.11 十六湖國家公園短途遊/怡人小村莊餐廳 Day 7 - 8 June (Fri) Plitvice Lake 十六湖國家公園,正式入園參觀. 落左山坡,係一個青青草地,前少少就係一個好大湖好清澈的湖.十六湖嘛,梗係周圍都係湖,haha. 再介紹番少少十六湖玩法,西面上湖區有12個湖泊,東面下湖區有4個.東面及中部各有一個入口,園區裡頭有餐廳,某些路段要以車或船代步. 官方為訪客設計左7條路線,由淺入深,可以簡單地花2至4個小時遊覽是旦一個湖區,亦可以花6至8小時行畢整個園區路徑.如果入住園區的指定三間酒店,仲可以免費響第二日再次入場. 我地今次只夠時間行下湖區,由2號入口入園,就會跟住F路線行.園入面指示牌充足,非常易行,你按指示跟住大路行,唔好亂咁轉彎,絕對唔會盪失路. 去到湖邊率先坐船過對面岸,再轉另一艘船去下湖區.坐船途中可以欣賞湖上四圍的風景,而湖水又係綠色既好特別. 來到下湖區,因為天下起雨,但我地又唔記得帶傘,所以走入紀念品店避雨. 響鋪頭見到克羅地亞頗出名的無花果朱古力,平時響超市都唔多見到,所以即刻買左一盒再加薰衣草朱古力. 好在今日唔係落大雨,只係驟雨毛毛細雨,如果唔係都唔知點算,都唔駛繼續遊覽了. 天陰陰反而有天陰陰既好,一來唔曬唔熱,涼涼地好清爽好舒服,二來響呢一種光線下影風景會有另一番感覺. 關於十六湖景色其實都唔駛文字交代太多,大家睇相就會見到. 比較有特色係湖邊棧道,泉水湧落湖好有氣勢,水流好急速,響旁邊行其實有丁點危險,不過大家自律乖乖地都好安全既. 十六湖著名景點其中之一,大瀑布 Veliki Slap (The Large Waterfall). 我地係爬上對面既山頭觀賞呢座咁高既瀑布.除左瀑布,下面一層層既湖都係好值得細心欣賞. 另外經典的景點係由高處俯視呢條S形棧道.有少少人同大自然合二為一的感覺. 黎到呢兩個打卡位,呢次十六湖之行已值回票價. 點擊圖片放大 +54 返多少少路就到本身suppose可以搭車返回起點的巴士站,好遺憾呢個星期園區車路工程,搞到我地無車搭,焗住要步行多廿幾三十分鐘,先返到我地既起點. 沿路都係樹林,啲樹又係好高好密集,而且block晒十六湖風景,好在係石屎路都行得舒服,唯有當行多一段山啦. 路途中仲同一對香港夫婦一路行一路傾,分享呢幾日去過既城市,時間就過得快啲,返到起點既cafe. 大部分人轉彎行上去2號門口揸車走,唯獨我地兩個繼續跟住山路向上走,返番黎呢個一個人都無既恐怖叢林. 其實真係有啲恐怖,佢最慘係太少人氣,一啲聲氣都無,靜到唔尋常.依家諗番轉頭,果度都唔知會唔會有咩靈體,不過當時就唔會聯想到果啲野,可能覺得西方國家唔興有呢啲野啦. 同埋慶幸我地行左無幾耐見到前面終於有兩個女人,都係返緊去Mukinja村莊,當堂放心啲. 雖然克羅地亞係遲入黑,但其實你會feel到個天開始暗,加上今日陰天,而且樹叢擋左好多陽光,所以依家返去係剛剛好,再晏啲就唔安全了. 平安返到小村莊,先去搵超市補給.話說呢個小村莊好cap,全村只得一間營業時間唔長的超市Robni Centar,餐廳亦只得一間,僅此而已. 條村好細,但啲屋間間都差唔多樣,令到間超市幾隱蔽下,入到去都覺得呢度係頹頹地,店員都係hea hea地,反而見到有堆中國學生. 另外都想highlight呢度既奶類製品係超級頂級爆級平,兩蚊盒紙包牛奶係咩玩法. 我地買完野無返酒店,直接去果間全村唯一一間餐廳Bistro Vučnica. 網上評論,啲人覺得呢間野係非常之麻麻地,係因為無選擇先焗住食佢.亦有人話呢間野好平,所以都算係good value for money,無得強求太多. 我想講原來呢間餐廳係for佢既滑雪場,本身我以為呢個村有片好大好靚既草地,想開三腳架影相,但原來呢片草地其實係冬天既滑雪場黎,即係呢度冬天會落雪. 可以想像到,呢度冬天係幾靚,而依家夏天,望住片草地食餐簡單既飯,都已經好心滿意足. 黎到歐洲食左咁多餐,都唔知想食咩了,Sue就叫burger,我就叫呢度主打既pizza,啲人話呢度既pizza係抵食既. 我本身唔知pizza既small,medium同埋large係幾大既size,穩陣起見都係叫small算.果然無錯,上菜時,呢個其實係香港Pizza Hut普通批細丁點既size黎,嘩真係大件到無朋友. 味道方面,呢間野果然係得pizza有咁上下的水準,Croatia Pizza好重芝士好正. 因為前一晚食左個人生最好食既burger,今次呢個burger相形見拙,明顯差幾皮啦,乾身唔夠juicy,不過絕對唔係難食既. 甜品叫左碟朱古力pancake,呢隻pancake同想像中有少少分別,似係煎一塊雞蛋麵粉,再加nutella醬多啲.不過味道又唔係差既. 所以,整體黎講,呢間野真係平平地黎講質素中等的餐廳,慳錢黎講其實係幾唔錯既,未至於要被人攻擊得咁犀利. 真係慶幸無太夜返,話說我地旅館間房正對面就係餐廳,我地梳洗之後無幾奈見間餐廳已經打烊,果陣先係八點半,如果太遲返黎呢條村真係乜Q都無. 不過城市人就係應該學習適應一下郊外村莊的生活作息喇~ 點擊圖片放大 +27