11/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.9 漫遊Split/驚豔漢堡 Day 6 - 7 June (Thu) 玩完出海的one day tour,返番黎Split.趁距離天黑仲有些少時間,再遊多一陣呢個舊城區. 今趟trip可能因為食野方面無特別慳,所以就算無食啲高級野,使費都超出了預算少少,要去ATM機提款. 響Split有樣野好就係直接住響城區入面,唔似得Dubrovnik要transit先有野行,依家一落樓就有野睇. 行多兩步出去就係好靚好闊的海傍,好有度假feel,有少少似放大版再加闊的赤柱.感覺好寫意好自在,真係想留響度唔返香港. 逛過一啲好有特色的精品店,個人護理用品店等,又去番我地尋日黎過既廣場. 廣場再後面就係一個幾集中的露天市集,呢度好似叫Green Market,賣既係蔬果為主. 響外圍其中一檔買左一公斤車厘子,兩條友坐響海傍食邊食得晒lol 我諗裡頭攤檔應該賣得再平啲既,不過呢檔只係十零蚊已經覺得好平,而且味道仲要唔差添. 點擊圖片放大 +19 再行陣城區西面的一條高級零售大街,呢邊條路明顯闊啲同光鮮啲,似係新建而成,兩邊都係大型品牌. 最熟悉的係間唔中響香港都會行既Bershka時裝店,呢度有幾層,女裝淨係行地下果層都夠做. 街尾仲有百貨中心,不過唔夠時間就無行了. 天開始入黑,落番海邊,去搵一間叫Toto's Burger Bar既漢堡包店. 呢間野響trip advisor評價唔錯,果然裡頭都有好多人幫襯,而且睇得出黎呢間係有style的餐廳,裝修及擺設都好有特色. 我地就想好好享受一下Airbnb,順便早啲休息,所以買外賣返宿食算. 叫左個Chicken Burger同埋Crispy Bacon Burger,如果單點,價錢大約70至90蚊,跟餐配薯條同野飲就大約100蚊,價錢算係合理. 食過咁多餐,我地知道歐洲啲burger一定大份,可能Sue一個burger都食唔晒,所以都肯定唔駛叫兩個餐咁多. 呢間野唔係頹同hea做果啲,burger係新鮮熱辣辣即製,跟餐野飲有唔少選擇,可以揀樽裝果汁都得,而唔係逼人飲溝左水分既汽水.另外,除左薯條必備的茄汁,佢仲會俾多包mayonnaise沙律醬你,好岩我口味.加上餐廳員工服務有禮,可見呢間野係有心做既. 重點講味道,呢間可以話係我呢個旅程食過,或者人生以黎食過最好味的漢堡,直頭可以用驚豔來形容.至於可唔可以話係旅程最好食既一餐呢?...因為豬手都好好食,我諗,呢餐就算排唔到第一,都排第二. 點解外賣都咁好食?首先佢多汁,呢個burger超級juicy,芝士同蛋係屈機,你見成張包裝裝都濕晒就知,雞肉好滑多汁,連埋啲醬一齊食真係人間美味.而且麵包鬆軟唔係乾硬身果種,所以成件事係十分美好. Sue揀既burger都好食既,不過可能因為太多肉搞到太鹹,所以都係我揀既chicken burger好食啲. 薯角,好熱氣不過好味,唔算特別大兜,但兩個人食都夠做,因為個包實在唔簡單,咁大件肉咁多醬汁既包,一定飽到滯haha. 好開心可以響行程尾聲時食到滋味的一餐,好滿足.因為我foresee到黎緊一兩都唔會有機會食好野,所以用呢餐burger黎round up我地既Split旅程好圓滿. 臨訓前,食埋剩低既車厘子,同埋淺嚐房東為我地準備的紅酒,舒舒服服入睡,準備第二朝一早出發去十六湖. 點擊圖片放大 +28