10/7/18 晴 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.8 出海遊島 - Stiniva Bay/綠洞/Budikovac/Hvar島悠閒午餐 Day 6 - 7 June (Thu) 遊過藍洞呢個神奇景點,我地隻艇繼續出發,下一站係Stiniva Bay,另一個天然的大自然景觀. 呢個細小的狹窄海灣,沙灘被兩座大礁石所環擁,形成一個細小的圓環. 為了顧及泳客安全,所有船隻一律只能泊於海灣浮波外,要去海灘就要落船自己游水過去. 其實都幾特別,都係第一次見啲國家有咁樣既安排,令呢度變得好珍貴,無咁易acces到,好似世外桃源咁. 相信響泳灘上影番出黎個景應該好靚幾壯觀下,不過我地無打算落水,而且同團一大家人都唔打算響度游得幾分鐘,寧願集中響下個地點游耐啲. 點擊圖片放大 所以小艇直接駛走,去下一個景點,Green Cave 綠洞. 網上睇到綠洞既相,又係洞穴內的海水係淺綠色既,可能又係由於陽光的反射導致. 不過綠洞洞口太矮,要落水游入去,所以大家又係skip左佢算,haha. 終於去到呢個唔知乜灣,無乜景色唔太靚,睇google map應該係叫Budikovac Island,終於係大家盡情游水的時候. 同團果家人好似好興奮,成村人跳落水,但只係浸水傾計又唔係游既,haha. 我同Sue就同果家人既九十幾歲老人家同埋一個疑似媳婦,留響船上休息同等夠鐘. btw,留意相片,你見啲團友游水啲水係淺綠色好清澈,克羅地亞Split呢邊對開海域,唔難發現啲水係綠色既,或者湖水藍色,好特別,呢個現象可能就係網上見既Blue Lagoon. 點擊圖片放大 +4 隔左半個鐘有多,終於出發去最後的重頭戲,Hvar 花島. 坐船前往一個未知的新島嶼,個感覺係特別的,先遙遠地觀望呢個島,慢慢接近,再近距離欣賞島上一景一物,再到岸落地. 花島個格調都似今朝去既Komiza,不過呢度大得多,圓形海灣,山上仲有堡壘. 花島出名薰衣草,雖然岸上無見到薰衣草,但啲人話會聞到好香的薰衣草香味. 落船第一件事就係食野,因為已經三點零鐘,真係好肚餓.呢度好多餐廳,兜左一輪,揀間好似平啲又有想食既野既海景餐廳Kod Kapetana,感覺性價比高啲. 逢親啲外島,無論係遊客抑或島上的人,感覺都係比較悠閒他調,唔會同你急,動作比較慢. 呢間餐廳個侍應一樣,本身間鋪無乜侍應,佢又匿左響餐廳入面,又唔走出黎接待我地.但經過響捷克同克羅地亞呢幾日既遊歷,我發覺你唔可以chur佢地,最緊要唔好激嬲佢地,等佢地serve你就得,佛系幫襯,緣份到了佢自然會走出黎好殷勤地招呼你. 先上魚湯及蕃茄湯.魚湯我開頭以為係周打魚湯或者忌廉湯之類,點知原來係清湯黎,配以魚肉碎及蘿蔔碎,真係十分清淡,伏伏地.個蕃茄湯就正常夠味. 太愛食risotto,墨魚汁意大利飯,好靚的伴碟裝飾,又係穩穩陣陣好食既,墨魚肉好大粒. 海鮮意粉,係我響歐洲另一樣好想試既菜式,一來可以試當年人煮的意粉,二來又有海鮮,一舉兩得. 海鮮有蝦,青口,蜆.蝦多數係細蝦仔,但有幾隻大少少的中蝦,呢隻中蝦我第一次見,頭上有好長的鉗,蝦殼似瀨尿蝦有少少硬身,所以呢隻有少少似龍蝦仔. 我想講個汁好味,吸盡海鮮的精華,可能佢落左少少酒黎煮,令到成碟意粉都好香好好味,一流. 人生真係無幾可餐餐飯都對住個海,夫復何求.知道響克羅地亞都剩低唔係幾多餐,把握每一秒鐘,記錄同享受用餐的時光. 點擊圖片放大 +19 花島碼頭上係一個露天市集,賣好多薰衣草有關的精品,成條街都係薰衣草味.我地之後幫襯左個婆婆,買左一堆薰衣草香包及精油. 另外呢度既建築都係好有歷史氣息,個廣場好grand,而且發現歐洲啲石磚地都係好光滑,陽光猛烈時,光線係直接射落地面再反彈上對眼,真係刺眼到要戴太陽眼鏡.同埋就算補太陽油,最後都係曬傷了皮膚. 食野食耐左,唔算太多時間遊花島,都係片面地行晒大街主要有得睇既野,臨尾響碼頭附近的小店叫左杯Shiny Star Smoothie.材料有香蕉,菠蘿,桃,乳酪及牛奶. 飲落又係好味既,因為啲配料都係自己中意,穩陣唔會伏.不過可能一飲完就上船,成肚水,坐船回程時拋下拋下,返到Split果然肚子唔舒服,要返民宿解決,haha. 點擊圖片放大 +18 不過啟程返航都係一段好開心好難忘的經歷,船長播住啲個style似凱旋回歸,圓滿結束的歌,夕陽開始西下,真係好岩feel. 另外亦終於感覺到我地今次歐洲之旅差唔多完結,差唔多時候返香港了,sosad... 但隔兩秒,即刻掉開呢個念頭,因為我地都仲有一日半既,仲有一個大景點未去既,haha. 返Split途中,可能因為黃昏潮漲,不時遇上大浪,嘩呢個就刺激了,好似坐緊一個長途過山車咁,不斷拋高拋落,遇到某一兩個大浪,真係成隻艇升起半層樓咁高再跌番落黎,嚇到後面訓緊教既九十幾歲奶奶都醒左,笑死. 明明隻艇無安全帶只靠自己扶手,我地呢啲後生唔識死,淨係覺得好刺激好好玩,但試問香港又點會有得咁樣玩法. 六點半抵達Split,我仲諗緊駛唔駛俾tips導遊及船長,但泊岸後旅行團已經自行解散了,所以我地都直接先返民宿安頓一下,再出黎繼續玩. 點擊圖片放大 +4
