3/7/18 驟雨 克羅地亞之旅 2018 Sue & Raymond 5 - 10 June 2018 #thesweetestcoupleineurope Ep.3 Dubrovnik舊城區/好鬼正雪糕/打風落雨海邊晚餐 Day 5 - 5 June (Tue) 由山上Lovrijenac落番黎地面,返黎Old Town,城牆入口Pile Gate,門口有間官方餐廳的雪糕店,望落幾吸引,走入去試先. 響歐洲食野,有平有貴,你想慳錢的話唔一定食自攜的杯麵,但就要餐餐pizza,克羅地亞的外賣pizza真係可以平到你唔信,又大件,不過食左咁多餐西餐都食到口歪,唔係山窮水盡,都盡量避免買黎食.同埋雖然呢度鄰近意大利,意大利野好好食,但做到咁平的話,質素好極一般. 反而雪糕黎講呢度真係平靚夾大件!質素等於香港食既幾十蚊支,但呢度只需十蚊至十三蚊球,又多味道選擇,見到杯大大杯既雪糕,就感動到喊出黎. 我地響呢間叫左蜜瓜同開心果味,真材實料,堅有果肉同埋果仁,一邊香濃,一邊refreshing,兩個人share剛剛好.好好食呀媽呀~~~ 點擊圖片放大 +8 沿小橋走過城牆區,進入舊城區.一入到黎首先見到Jewish Fountain,或者叫Large Onofrio's Fountain. 可以介紹少少呢度既歷史,舊城區早於1979年就被列為世界文化遺產,號稱「亞得里亞海之明珠,斯拉夫的雅典」,亦係電影Game of Thrones權力遊戲拍攝取景之地. 如果有時間的話,其實可以俾多100kn上埋城牆,圍繞古城走一圈,城牆約2公里長,都有排行,望出去係汪洋大海,望入黎係密集的紅頂小屋.亦可以頗近距離感受到呢度既歷史氣息. 不過我地諗過,都估計到上面望到既景象,就慳番啲錢同腳骨力了,倒不如逛下舊城區入面既大街小巷好過. 舊城區雖然好多雜巷,但如果想簡單explore其實都幾易行,因為一邊係餐廳同埋住宿區,而且係斜坡向上發展,無乜人會行. 另一邊就只有多一條闊落的內街,如果淨係行Stradun大街,以及呢條內街,其實都夠做. 我地當然係響舊城區既地標影相留念啦,包括聖布萊斯教堂,杜布羅夫尼克主教座堂. 值得一提係呢度可能近海所以有大量烏鴉飛來飛去同叫,如果唔係呢度多人,其實都幾得人驚下. 諗番起當年去三藩市惡魔島,離遠見成個空檔檔的球場,上面有數以百隻的烏鴉聚集,真係嚇左一下唔敢走落去. 點擊圖片放大 +20 睇相見好似係黃昏仲有日光,但其實已經係晚上八點幾,都要去食飯了. 行下行下,見到呢間位於舊城區東面,位於避風塘前面的露天餐廳Lokanda Peskarija. 以為呢個海景餐廳好貴,但睇睇餐牌,價錢都合理,而且聞到好大陣好香的燒海鮮味,所以即刻搵張靚檯叫野食. 首先要講呢度既麵包係好食啲,起碼係鬆軟果隻,唔會太乾,食得落肚. 本lemonade就真係好檸檬,太酸haha,麻麻地,早知叫其他野飲. 呢度沿海城市,似乎海鮮係必食.Sue夢寐以求的生蠔啊~ 呢度既生蠔係細隻果種,但海水味好鮮甜,都幾正. 隔離檯食客叫魚食,所以有幾隻貓響住佢地行來行去,博佢地餵魚肉俾佢地食. 我地就叫燒魷魚,呢個係超級,超級,超級好食!好重要所以講三次,首先佢夠熱夠香,夠大件,個汁又調較得惹味,最正係我都未食過有羔既魷魚. 呢大盤墨魚汁risotto係我人生食過最大盤既risotto,一般risotto都係細細份,因為本身都幾滯下,但呢度係一大盤,四個人share都得,所以真係食唔晒. 可恨的是,我地既食物只係黎左十分鐘,打完卡先剛開始進食,侍應就走黎同我地講話見到有烏雲黎緊,叫我地即刻搬埋啲野去餐廳外面有太陽傘遮蔽的座位. 我地仲斯斯然慢慢執野,點知唔夠一兩分鐘,已經開始落起雨,仲愈落愈大,天空一舜間變黑,繼而仲行雷閃電,處於室外都有啲擔心. 因為太大風大雨,太陽傘都擋唔住太多,其實都撇雨,有啲座位直頭淋濕晒.我地都食得幾狼狽. 無得邊食邊欣賞夜景事小,我最擔心係我地無帶遮出黎,萬一佢keep住落雨,都唔知幾時先返到酒店,lol. 唯有一邊食一邊等佢停雨,急急腳去番KRAS專門店拎番我地買左既朱古力手信,就衝去城外巴士站,好彩剛好有車仲上到,可以順利安全返到酒店. 點擊圖片放大 +30