30/6/18 晴 捷克之旅 2018 Sue & Raymond 1 - 4 June 2018 #thesweetestcoupleineurope Ep.10 Finale 克魯姆洛夫城堡/捷克超市/再食豬手餐 Day 4 - 4 June (Mon) 響我一個人慢慢妹埋隻豬手既同時,Sue已經出發走去巷仔另一邊既Botanicus購買手信. Botanicus係賣護膚品以及其他body care產品,聽聞係捷克必買手信之一,而且好適合女士. 由於我無跟埋去,所以未能介紹太多,詳細可以自己google下. 食完野,穿過舊城區大街小巷,來到今日的重點,克魯姆洛夫城堡. 不過我地既路線同布拉格遊玩既時候一樣,都係走錯晒,先入後門,然後響前門走,haha. 穿過小橋經過護城河,就屬於CK城堡範圍.本身以為呢條只係普通的一條河,點知check番地圖先知原來呢條都係伏爾塔瓦河,亦即係由布拉格一路黎到呢度,再繼續向南發展! 點擊圖片放大 +8 首先辛苦少少,拾級而上,上到城牆走廊,好快就黎到呢個「CK俯瞰全鎮拍照點」.呢個只係google map顯示出來的位置名稱,正式地名我都唔知. 但肯定既係,黎得CK,必須黎呢度,影呢張好經典,令你畢生難忘的全景圖. 俯瞰CK小鎮,左邊係城堡,彩繪塔之類的建築,正面係CK舊城區,一間間紅色屋頂的小屋,右面係彎彎的可愛小河. 其實係靚到dum一聲,成個畫面係勁colourful,構圖亦好完美,有密有散,好似一幅好靚的圖畫. 來到呢度,你會覺得,整個旅程最精彩最經典的,就在此達成了,捷克之旅亦再無遺憾. 點擊圖片放大 +11 觀賞良久,亦等一班班韓國旅行團散走之後,先可以棟腳架影相. 之後繼續行,走入城堡裡頭的通道,參觀好別致充滿藝術風格的建築. 途經紀念品店,走入去又掃左一大堆杯墊做手信,因為真係幾靚haha. 好快行到城堡前庭,呢度有另一座地標彩繪塔,可以從塔上俯瞰CK. 不過可能呢個東歐旅程走得太多路,仲日日都要行山,所以逢親呢啲塔我地都唔打算上去,haha. 點擊圖片放大 +3 好可惜護城河果邊見唔到果兩隻熊,把握時間返去行舊城區. 舊城區都係一間間鋪頭,有賣服裝,精品店,飾物店,食肆,都係小店黎. 一個幾寧靜幾悠閒的小鎮,確實令人幾寫意. 搵左間平價雪糕店,諗住有青蘋果味幾得意未試過,點知貪平就中伏了,個雪糕勁大陣香精味,得個甜字,完全食唔出奶味,可以話係我少有覺得難食的雪糕. 時間差不多,陪Sue返去Botanicus攞貨,就沿路返去巴士總站,搭番巴士返去布拉格了. 今次呢架係舊車黎,設施感覺上無咁靚,但服務都做足既.不過行左半日都有啲累,所以響車上瞌下算了,都無玩個熒幕. 點擊圖片放大 +15 返到Andel大站,因為身上永遠唔會有岩用既硬幣去用售票機,有啲車站甚至無票務處,幸好呢度係有既,可以直接同職員買. 來到Národní třída站,一出地鐵就係一個新新地既商場,地庫有幾間超市咁多,有高中低級,除左我地成日行既BILLA之外,最值得參觀一下就係廉價大型超市Tesco,係補購手信的好時機. 天色漸暗,因為布拉格商場廁所都要收錢,所以索性去我地晚餐地方,Restaurant Můstek. 聽Sue講,呢間餐廳都好出名,必食豬手.因為我地已經好夜成九點先黎,所以都大把位揀,淨係叫隻豬手同一樽士多啤梨汁就夠做. 有趣的是,星期一晚呢度反而有live music show,有幾個阿叔坐響走廊位響度吹色士風拉大提琴演奏,成間餐廳即時氣氛勁好. 首先又係一大盤麵包,今次啲麵包有部分係鬆軟易入口既,但其他都係硬掘掘. 至於隻豬手就無介紹錯,真係比下午果隻好食得多.因為呢一隻有醃得入味啲,就算好大隻好厚肉,佢啲味道都入到肉,總之係好食好多. 而且佢好用心,提供三種芥末醬,真係好講究.我唔識食,大概分辨出一隻濃一隻淡,另一隻似日本wasabi味,所以三款都蘸下都幾過癮. 食到飽一飽,最後店員仲送兩杯果汁酒,不過都幾重酒精下,我地飲一兩啖就已經feel到熱力. 食完飯沿Wenceslas Square商店大街行去電車站搭番tram返民宿,完成晒我地呢四日捷克既旅程,羿日我地將會前往布拉格機場,出發去---克羅地亞. (有關捷克之旅的後感,將連同克羅地亞之旅一併分享,請留意稍後克羅地亞之旅遊記系列) 點擊圖片放大 +38