23/6/18 雨 捷克之旅 2018 Sue & Raymond 1 - 4 June 2018 #thesweetestcoupleineurope Ep.5 平價超市/布拉格日本野/驚險逃票 Day 2 - 2 June (Sat) 落番山,搭tram返去舊城區,遲左一個站落車,變左來到著名舊城廣場的東邊. 呢邊有市民會館 Municipal House,正門壁畫好靚,忍唔住停低觀賞一陣. 另一邊有座黑黑實實既尖塔,就係火藥塔,充滿歷史氣息.呢度都係旅行團必黎打卡熱點. 響Republic Square行下行下,就走入布拉格其中一間連鎖超市BILLA,買水順便睇下有無咩手信岩. 估唔到歐洲既parma ham咁平,真係三十蚊一包,平香港勁多.吃貨Sue一定喪買,haha. 其他貨品都唔貴,特別係奶類製品例如乳酪,呢度真係爆多款,仲要係幾蚊杯,真係平到痴線. 我地特別留意飲品,其實唔少汽水都唔貴,有氣或有味樽裝水都超平,抵買過士多勁多. 點擊圖片放大 +13 其實天仍未黑,但因為坐左成日飛機,顛簸勞碌,黎到布拉格都仲未真正休息過,身體真係開始撐唔住. 所以決定提早去食飯,早啲返民宿休息.坐完長途機個肚一直唔舒服,先找一間出名的日本餐廳想食得refreshing啲,點知行左成段路去到先知無位,想等位佢都唔serve,唯有返番去Republic Square食間普通日本野,Sushi Oishi. 眼訓多過肚餓,簡單食個炸蝦roll同埋辣三文魚roll,整多個豬肉烏冬同埋麵豉湯,再飲樽清甜的椰子奶,好快就食完呢餐. 味道方面正常啦,係個辣三文魚幾惹味,比我預期好食. 食完想響出面搭tram直接返宿,點知兩邊月台都無售票機,問路人原來要走落metro站先有得買飛. 專登搵個metro出口,落到去又發現封左路維修工程,搵黎搵去都唔見有metro站,真係人都癲,本身已經攰. 最慘係你想上車買車票,呢度既tram又不接受呢種方式,一定要拎住張票上車. 我地再撐住疲憊的身軀,辛苦地行上多一個站,點知都係無售票機,真係就黎痴線.呢個咩城市黎,旅遊區中心竟然一部售票機都無. 再問多位中國留學生,佢話我地可以上車俾錢,咪跟佢上車,不過一如我所料,司機係咁講一輪野,唔知up乜,應該意思就係話無得上車俾錢. 不過我地都理唔到咁多,隊錢俾佢佢唔收,我地就拎住啲錢企響司機房後,依家變相係我地逃票,haha. 所以呢一程車都幾驚險,因為布拉格出名查票查得嚴,我地已經諗定,一遇到有人查票就即刻從車頭落車xd 好難捱的八個站,十五分鐘,終於都安全順利地返到民宿,可以鬆一口氣. 點擊圖片放大 +8
