23/6/18 雨 捷克之旅 2018 Sue & Raymond 1 - 4 June 2018 #thesweetestcoupleineurope Ep.4 搵笨士多/Dancing House/伏爾塔瓦河/高堡 Day 2 - 2 June (Sat) 爭取時間,黎到Airbnb放低行李整頓不久就出門口,務求響日落之前睇到最多風景. 去到歐洲,唔單止係周邊的氛圍,係簡單到街上每一座樓房,係每一座樓房,都靚到令你嘩一聲. 旅行係擴闊眼界的機會,平時逼響香港太耐,對得太耐香港密集的高樓大廈,黎到呢度見到咁多咁優雅既建築,感覺好治癒. Sue話捷克算係歐洲最靚既國家之一,唔知將來去到其他歐洲國家,會唔會都係咁靚呢? 捷克街上從來唔見我地認知的便利店,原來係無既.反而呢度係大量士多雜貨店. 通常佢地叫做mini market,或者super market.而香港人認知的超級市場,係叫mega或者hyper market. 由於布拉格已經係成熟的旅遊城市,呢度既士多做好多遊客生意,貨品價錢其實唔平,亦售賣大量紀念品,但性價比都一般. 所以會見到呢啲鋪頭,其實平時無乜生意,當地人要買野係走晒去真正的超市,呢度買野係認真平,稍後再詳談. 點擊圖片放大 Airbnb位置麻麻地,雖然出面有tram station,但接駁唔到好多我地想去既地方,所以出入都要行路. 先經附近靚靚地的查理公園,欣賞住捷克好有風格的樓宇,慢慢來到伏爾塔瓦河岸邊. 兌完錢,呢度就係第一個景點,Dancing House,跳舞的房子.設計好奇特的建築,好似有房出租可以入住,亦可以走上去天台觀景. 不過呢度其實望一眼就夠,純粹係個打卡位黎.我地主要係俾呢度既河景震攝.媽啊!會唔會太靚太舒服呀!~ 響河邊吹住風,陽光又唔熾熱,天色又靚,真係令人心曠神怡. 點擊圖片放大 +13 走到橋下見到有雪糕店,即刻買支黎食,因為落機後奔波一輪都幾口渴好想食甜野清涼一下. 呢間雪糕店既草莓雪糕好特別,顏色染到好紅,但好有沙冰感覺,真係食到好爽.而雲呢拿味都好creamy,味道好濃郁,貨真價實. 你預捷克克羅地亞食支雪糕都係大約十蚊或者十零蚊港幣咁,雙球就廿零蚊,其實價錢都合理. 但因為用呢個價錢已經食到大大支,質素又唔錯既雪糕,你會覺得呢度既雪糕比香港抵食好多. 點擊圖片放大 +11 沿河邊向南走,黎到呢個Vyšehrad高堡區,高堡區有咩睇?...就係響高處望番落黎伏爾塔瓦河,以及布拉格南面. 上到黎望出去既風景,又係另一個驚嘆.其他歐洲或美國遊客似乎就無咁大反應,可能因為佢地自己國家都有好多呢種景色. 相信我,呢啲景象,真係要親身來到,親歷其景,先會感受到果種驚豔.好廣闊既河景,藍天白雲,一望無際,相機都捕捉唔到咁多. 商堡上面有高堡公墓,聖彼得與聖保羅大教堂,以及城牆可供遊覽.我地淨係拍住城牆行已經覺得好夠做,不枉行咁多級樓梯上山. 呢度亦有人攤響草地,或者睇書野餐之類,都幾悠閒,令人羨慕,可惜我地無呢個能耐,因為仲要chur下個checkpoint,haha. 點擊圖片放大 +14
