13/11/18 晴 台北之旅 2018 Sue & Raymond 16 - 21 October 2018 #thesweetestcoupleintaipei #8 金花碳烤吐司專賣/西門紅樓/家樂福/淡水老街 Day5 - 20 Oct (Sat) 臨時加插的早餐店,金花碳烤吐司專賣.呢間唔單止係網紅店,連local都好中意,店外排左勁多人叫餐同等野食. 連店員都同我地講可能等得耐啲,要成40分鐘,咁我地於是先落order,然後先行背面的西門紅樓,行完再返黎食. 西門紅樓係西門町一個主要景點,外觀係一棟好靚的紅磚屋,裡頭就有文化藝術精品商店,有少少似創作市集,岩晒啲文青行. 兜個圈返番去早餐店,原來我地既野食一早已經製作好,店員好有心,因為驚之前整好果塊蛋餅會凍晒,重新為我地整過份蛋餅. 我地叫左招牌的「給我壁咚」同埋「愛過火」,就咁坐響鋪頭出面既座位食,好local feel. 「給我壁咚」,有好多蛋同芝士組合而成的烤三文治,咁豐富咁濃郁一定好食,不過我就覺得呢隻味道可能媽媽都整到,只不過呢個烘得香口,而且夠平夠抵食咁解. 「愛過火」即係火腿加芝士的蛋餅,ok啦,唔算好出色,比較油膩左少少,但味道都可以既,份量少啲. 點擊圖片放大 +24 快快食過早餐,就行去西門町南面的家樂福大型超市,最後階段買手信同埋掃平價食物. 返過幾次深圳都未有機會行家樂福,反而響台灣第一次行,家樂福同我當年行濟洲啲大型超市,以至再早年響美國果啲tesco一樣,都係應有盡有,一應俱全. 家樂福地下有餐廳及商店,中間有兩層百貨超市,上層有更多各式食肆. 重點當然係行百貨超市,真係乜種類既野都有,連大型電器,波鞋都有得賣,好誇張,我地呢啲香港人少見多怪,haha. 零食當然都有唔少,視乎種類及牌子,有啲堅平,另外生果都唔貴,抵買架. 最後買左成箱貨物,餅呀茶葉之類,要捧番Airbnb先. 點擊圖片放大 +33 下午既行程,係坐接近一個鐘既捷運,前往淡水. 淡水似係無論遊客抑或本地人都中意黎既地方,今日星期六,但車站外廣場係一大棚人,好多一家大細黎玩,度過愉快週末. 我地先過馬路,去對面內街搵野食.Mark左呢間淡水滬尾豆花店,好似幾平民幾local咁,都keep住有食客幫襯. 味道黎講就幾得意既,因為呢度有四色豆腐花,原味,布丁味,可可味,杏仁味.另外會有toppings,例如珍珠同埋紅豆等等. 豆腐花食落無香港果啲咁滑溜,但味道都可以既,而且布丁味其實咪即係布丁,可可味都幾盞鬼,有趣既. 轉彎出黎有檔賣梅香雞既鋪,老闆同老闆娘同我地講鹽酥雞周圍都有,唯獨呢度先有梅香雞,於是我地聽佢介紹,試一包梅香雞,咦又真係幾好食喎,無鹽酥雞炸到咁熱氣,但又做到鬆脆香口之感覺,而且有果種梅香鹹味,肉質都算滑,又真係唔錯. 再飲埋珍煮丹,又一杯黑糖珍奶,再飲落去我地會唔會肥死,haha. 點擊圖片放大 +23 返番過黎近淡水車站呢邊,淡水金色水岸的草地有music show做緊,淡水老街就係繼續搵野食既好地方. 入食街無幾耐就見到晴光紅豆餅,類似之前食既車輪餅咁,我自己就中意食忌廉味多啲,紅豆好似唔夠甜. 再行前少少,有間曾記阿給魚丸湯,原來淡水又係出名食魚丸湯,呢間啲魚丸有少少似香港既豬肉丸,但就釀左啲肉響粒丸入面. 花枝丸個湯濃啲,而魚丸個湯係清既,較易入口.另外挑機叫左個「阿給」,賣相已經麻麻地,食落果然唔好味.類似係腐皮包住一大堆粉絲之類,面頭再加pat類似蚵仔煎既醬汁,又係勁膩勁奇怪,真係試一次就算. 點擊圖片放大 +36
