12/11/18 陰 台北之旅 2018 Sue & Raymond 16 - 21 October 2018 #thesweetestcoupleintaipei #7 商業化的九份老街/瑞芳/食盡饒河夜市/天天利美食坊 Day4 - 19 Oct (Fri) 響瑞芳落車,出到黎就係前往九份既的士站,驚覺依家前往九份的標準的士費好貴,要成50蚊港幣以上,好唔抵搭. 跟箭咀指示步行前幾個街口,原來依家多數人都係坐巴士去九份,而且有幾條路線會去到,都算方便. 最重要係巴士只係15蚊台幣,平勁多,區區20分鐘車程,我就唔介意企巴士上山,慳番呢幾十蚊旅費. 九份老街既入口好狹窄,入到去係一條好擠逼的商店街,有少少似行香港的赤柱市場. 九份已經變得好商業化,多左好多自稱老字號的餅店手信店或者小食店,其實都未聽過. 我地響魚丸伯仔叫左兩碗魚丸湯同埋一個豆干包,魚丸湯味道ok,魚丸係軟腍,唔係爽口彈牙果隻.豆干包即係炸豆腐入面釀左啲肉類餡料,食落又ok架喎,唔差,食得落口. 再行一陣又見到傳統手工餅店,張師傅餅店,見係比較舊式風格所以幫襯下,又買個芋頭酥食.到底呢個旅程我地食左幾多件芋頭酥haha xd 賴阿婆芋圓,Sue上次黎已經有,咁應該真係老字號,要幫襯一下. 芋圓有四隻色,代表四款口味,食落似糯米糍或者糖不甩果種口感,Q彈Q彈,飲落就似紅豆沙,因為佢確實放左紅豆落去煲. 呢個旅程我開始接觸芋圓,俾我既感覺係都ok,唔算難食,因為有啲人好憎芋圓,或者好怕咩甜品都刻意放芋圓落去. 落住雨行九份老街的斜路,擠逼之餘亦頗為辛苦,入夜後,響老街盡頭望出去山嶺,身心幾舒暢. 沿豎崎路梯級落番去,就係另一逼爆景點,阿妹茶樓.呢度好多大紅燈籠高高掛,整晒打卡位俾人影相. 隔離仲有昇平戲院,呢一帶都好有氣氛,你會明白點解咁多人選擇黃昏夜晚上前來九份. 點擊圖片放大 +57 由於九份實在太逼,可以逛既都逛完,所以唔多作逗留,預番多些時間去搭番巴士落山,返去瑞芳. 上山難落山易,10分鐘已經轆到落黎瑞芳,好似坐緊中大校巴咁. 大把時間,於是行埋呢個小小的瑞芳.話說瑞芳除左有路邊攤檔好似夜市咁之外,裡頭仲有個瑞芳美食廣場. 呢個美食廣場認真平民,係當地人先會走入去幫襯,有兩餸飯,即煮粉麵飯,小食,糖水,應有盡有. 行埋附近的超市,就返去瑞芳車站等18:47pm自強號火車,返去台北松山. 點擊圖片放大 +24 饒河夜市位於松山車站外大約幾分鐘的步行距離,見到果一大座好有霸氣的松山慈祐宮,就係饒河夜市的起點. 饒河夜市規模比師大夜大大得多,成條饒河街幾長下,而且人煙稠密,行都幾難行下. 呢度野食選擇多,有部分仲設有座位,好似成個大牌檔咁. 福州世祖胡椒餅,呢度食既胡椒餅感覺同香港見到果隻有少少分別,呢隻濕潤好多,香口,香港果啲好似硬掘掘,又乾爭爭,no good.不過呢個胡椒餅都幾辣,所以我都食唔晒. 小上海香酥雞,似係local會食既鹽酥雞,味道唔錯,係細粒左啲,都ok既. 下港名彭臭豆腐,望落好似好受歡迎,但食落就一般,太多豉油太濕太鹹,唔似一般香港食果種脆口. 炸鮮奶,好有趣的口感,似炸芝士,不過呢度好似賣貴左,同埋一串得三粒唔夠喉啦xd 福島屋圓圓燒,真係日本人主理,亦吸引唔少人幫襯.食落等同燒餅果種味道,大大塊兩個人share剛好,幾滿足.你話係咪好出眾我又唔敢講,但可能係響台灣食到啲地道日本小食,個感覺得意,所以先咁受歡迎. 飲料方面,飲左杯西瓜汁同木瓜牛奶,呢間木瓜牛奶雖然sell現場即開木瓜夠晒新鮮,但落奶太多,所以又係偏甜,有點失望. 點擊圖片放大 +74 唔好問點解我地食左咁多野,返到西門町仲食得落天天利美食坊,只怪西門町實在有太多好野食想試,haha. 滷肉飯加蛋,味道ok啦,間間餐廳啲滷肉飯都差唔多,唯獨程味珍既滷肉飯再出色啲咁解. 講左好耐,真係試下蚵仔煎,果然都係難食既,唔明點解台灣人或者一啲經常去台灣旅行既香港人,咁中意食呢味蚵仔煎. 我地覺得蚵仔煎用得太多魚膠定唔知咩黏狀物體,然後又勁多醬汁,好似一pat野咁,實在太膩,唔知想點.我地都係中意食乾身既炸蠔餅多啲. 最後響Airbnb樓下買左包韓國鮮烤魷魚絲,以為好平無問價錢,買完先知中伏,呢包咁既野成50蚊港幣,痴孖筋,又唔係新鮮熱辣辣,大家下次行過見到千祈唔好買. 點擊圖片放大 +12