12/11/18 陰 台北之旅 2018 Sue & Raymond 16 - 21 October 2018 #thesweetestcoupleintaipei #6 山文治碳烤吐司/冷清菁桐/十分放天燈 Day4 - 19 Oct (Fri) 因為天雨關係將行程日子對調,黎緊兩日都係比較chur,去得遠啲既行程. 一早醒來,冒雨落樓下買早餐.由於7點半山文治碳烤吐司先剛剛開門,捲閘都未打開晒,所以我先兜去後面既西本願寺望一望,先折返買外賣. 山文治碳烤吐司,又係網上推介的早餐店,花生雙肉蛋,好似係呢度既招牌,另外再加太陽蛋,再叫兩杯奶茶. 趕搭book左車飛既火車,抽住成袋早餐就出發去搭捷運,並於台北車站大堂直接轉線去火車站. 幸好票務處排隊等得唔耐,上到月台時間鬆動,終於可以食下野頂下肚. 山文治個多士suppose應該係ok既,可惜擺得太耐都凍晒,味道失色不少. 但落左花生醬餡料係真係有畫龍點晴作用,又令成件包好味左,突出左. 鮮乳茶同奶茶個味道其實就無乜分別,都係太多奶,唔夠茶味,麻麻地. 點擊圖片放大 +37 我地乘坐9:01am既自強號,預先畫位,舒舒服服坐到去瑞芳,再轉9:58am區間車,大約11am前去到平溪線總站菁桐. 菁桐係那些年電影取景地點,車站散發住陣陣的歷史氣息,火車路軌,以及近山的古舊建築,都係影相打卡的好地方. 車站外的菁桐老街唔大,亦唔見好多遊人,比較冷清,行幾步就好似已經行完. 向郊野方向走,會見到條樓梯向下,下面就係中埔鐵橋,亦稱情人橋. 老街另一邊,就去到菁桐天燈館,穿過一條橋,就到達菁桐日式宿舍群. 都係無乜特別,純粹感受一下台北近郊的感覺. 有啲人會選擇響菁桐車站放天燈,因為呢度真係完全無人,慢慢搞,慢慢影相都得,亦唔怕後面多人. 不過我地都prefer一定係響最signature既十分先放,所以都係乖乖坐響火車等12:12pm開出去十分啦,haha. 點擊圖片放大 +35 12:30pm到達十分,都仲係落住少少雨,似乎台灣就係難以避免落雨,令人遊玩得幾狼狽. 肚餓了,即刻食火車站隔離,網紅的溜哥炭烤雞翅包飯,有點似糯米釀雞翼,熱辣辣,好香好好食,下次再黎都會食. 再向前行,去番火車路軌的位置,黎到十分最經典放天燈的區域,呢度有間榕樹下米粉湯,都係網上推介,我地都去試試,順便坐一坐避雨. 叫左招牌米粉湯,蕃薯葉,豬耳.米粉湯有點點家鄉風味,有菜脯定柴魚之餘既配料,增添口感.蕃薯葉炒得唔錯,好新鮮.豬耳爽脆,略嫌太多汁太稠身. 兜個圈,觀察周圍唔同天燈鋪頭,揀好心水鋪頭去畫天燈寫心願. 天燈有成八面咁多,每隻顏色代表不同意思,諗唔到寫咩好?...隔離掛住塊牌都俾左好多ideas可以參考下. 寫好許願字句,就可以交俾店員幫忙,帶領你出去搵位置放天燈. 店員做慣做熟,好快教晒你點擺pose,點樣拎住天燈,指揮住你放手,順便拍埋片影埋相,一條龍服務,成個流程都好快. 但願我地啲願望都可以實現啦,haha~ >v< 放完天燈,繼續響十分老街走走,響周萬珍餅舖買左件芋頭酥.又買左個花生捲冰淇淋當甜品食.兩個都好食,而且花生捲冰淇淋好特別,響十分食好有風味. 靜安吊橋,好古舊的建築,但就吸引好多人影相留念,呢度望出去個風景都好靚. 陰天有陰天既玩法,慶幸我地出黎放天燈時停左雨,之後都無再落雨,天陰下影十分都有啲feel. 雖然聽過有人話十分無咩玩,又多人,但黎過一次,我又覺得幾好丫,感覺唔錯,氣氛幾好,又有啲浪漫,預留三小時響呢度係ok既. 臨尾差唔多要上火車離開十分,拿拿林響車站既紀念品店買木製postcard,快快趣填完地址,chop紀念印章寄出,就趕上3:40pm的火車,返去瑞芳了. 點擊圖片放大 +74