10/11/18 陰 台北之旅 2018 Sue & Raymond 16 - 21 October 2018 #thesweetestcoupleintaipei #1 序言/香港航空/西門町Airbnb/程味珍滷味意麵 Day1 - 16 Oct (Tue) 十月的六日五夜台北之旅,返來香港已經有一段時間. 本身都有少少時間,可以即刻動筆寫今次旅程的遊記,但結果又拖下拖下. 主要係因為今次旅行實在太多零碎,好似每樣細微野都值得講,可能係第一次去台北的關係. 但我又唔想又整到個遊記系列太冗長,好似當年韓國之旅成三十幾集咁. 加上自己已經累積了一定的旅行經歷,而且大家的旅遊經驗可能仲豐富過我,台北又係熱門好多人都去過既地方,都唔須要太花時間去介紹. 所以,今輯遊記系列,可能我會盡量縮短集數及濃縮篇幅,簡單一句半句講述細節,present番general既picture就算. 主要都係想俾大家了解下我地既行程,分享一啲我地覺得唔錯既選擇,俾大家有個參考. 不過,相片方面都會放晒出黎,唔刻意再花時間篩選了,如果大家有進一步想知的詳情,歡迎隨時留言!~ 第一次坐香港航空,感覺係呢間airline雖然係一般航空公司,但已經開始走緊廉航風格,佢鼓勵你用自助check-in系統. 自己嘟passport,拎機票,自己綁行李tag,再check in luggage,全程自助.第一次玩係好玩既,但感覺好似有人幫你handle會安心啲. 港航飛台北班機係A330,5:50pm機,座位呈2-3-2排列幾中意,任何人數的組合都可以一齊坐唔駛同陌生人一齊坐. 電視就麻麻地,咁岩呢部機機款舊啲,電視唔係輕觸式,遙控粒制都壞壞地,差啲用唔到部機. 抵埗搞得最耐係排隊過關,勁長龍等成25分鐘,過完關出到黎係行李等人. 點擊圖片放大 +15 我地訂的Airbnb,只要book夠五晚,就可以送一程機場接送,由房東車我地直接到台北西門町Airbnb. 機場離市區都幾遠,私家車都要半個鐘車程,呢間Airbnb我地幾中意,因為空間夠大,有梳妝台,客廳有洗手盆,冷氣夠凍. 整體設備都幾新淨,可能最近翻新過.雖然露台出面無景,但房內環境夠做,呢間Airbnb距離捷運3分鐘步行路程,非常就腳,佢因為空間大,房價比其他附近Airbnb貴丁點,但都覺得值回票價. 點擊圖片放大 +14 Settle down後都好夜下,快快動身落樓下食野.準備行程時已準備大量西門町美食資料,第一餐率先食位於西門町北面的程味珍滷味意麵. 自己拎餐紙,畫好想食既麵,就行出去交俾阿姐,同埋講想食既滷味,阿姐會幫你計數. 我地叫左好多款豆腐,都分唔到有咩分別,haha.程味珍滷味比較濃味,幾鹹下,不過份量都算多,我地叫得太多食唔晒. 乾意麵就唔係真係乾既,下面其實有滷水汁,好似撈麵咁食,味道ok,不過再食埋滷味就更加鹹. 反而呢度既滷肉飯係我地覺得好好食,因為個醬汁做得出色,唔會太油膩唔太多汁,滷肉夠肥但唔會令你食到口歪,而且個飯底好食.所以成餐飯,最好色係呢個滷肉飯. 點擊圖片放大 +10 食完餐飯好飽,經過北回木瓜牛奶,買杯黎飲飲.響香港,多數都係台式飲料,反而來到台灣見到多啲不同種類的飲品,而且木瓜鮮奶感覺比較清新及健康啲. 第一次飲呢杯覺得好正,因為佢有少少似shake,每一啖都飲到碎冰,夠凍夠甜夠奶夠木瓜味,真係好正,而且夠平. 飲住野行夜間的西門町,因為係平日晚而且已經夜,而且當晚落過雨,所以人流唔算好密集. 我地兜個圈望兩眼,就去買好雞匯鹽水雞返Airbnb做宵夜. 我地呢個旅程食左幾餐鹽水雞,我覺得鹽水雞原來唔係幾係我杯茶. 但食過幾間之中,好雞匯鹽水雞,算好食,讚!~遲下再解釋點解我中意好雞匯多啲. 點擊圖片放大 +35
