終於都黎到粉紅城市Jaipur，整個城鎮都好多人，感覺就好似孟買一樣咁繁忙。 好靚嘅粉紅大門，火車落車後我就係靠佢得知我到達！ 黎到呢度嘅第一日，今日嘅行程係咁嘅，我會先去咗一個museum買張多個景點嘅入場卷﹝因為有張入場卷係可以一張入場卷去哂咁多地方，平D。﹞，響市集行下﹝呢度有好多好大嘅市集，好多野賣﹞，去下風之谷﹝即係傳說中嘅Hawa Mahal，佢地話黎到Jaipur就一定要去呢度﹞，睇下戲﹝係！我要去睇戲﹞。然後，到咗第二日有整日嘅時間，先去著名嘅Amber Fort觀光。出發！ 就係呢個museum，可以一次過觀光順便買張多個景點嘅入場卷。 反正都黎到Museum，入去行下。 入面好似好多博物館咁，都係有好多印度古代嘅珍貴物品。 熟識嘅七彩玻璃 ～ Jaipur係一個比我感覺幾特別嘅地市，就好似整個城市都係市集組成一樣。每一分，每一秒，都好熱鬧。即使唔係店鋪，隨處都有小販響街邊賣唔同嘅貨品，食物。 其實我好想試下個漢堡包！ 不過最後我比炒麵吸引咗，好味！！！ 唔同嘅香料隨處都有得買。 最特別就係，Jaipur竟然有… 公眾廁所呀！！！印度咁大，大部份男人如果要小解，大多都係拎轉面向住牆就去，依我眼見，即使響大城市都係… 但女生就未見有，傳言中話印度女生著saree都係方便要去解決時，saree可以方便遮掩身體，是真是假，我都唔知。不過，我響呢個城市竟然比我見到有男生嘅公廁，然之後我就更加唔明，男生背向人而向牆就已經可以小解十分方便，相反女生真係無可奈何，點解唔整個公廁比女生而要比男生呢 ~.~ 真係好唔公平嘅對待！同埋，我真係覺得呢個公廁有同無，都無咩分別！ 其實過程幾搞笑，因為佢地一拎轉面過黎我就即刻扮無野，等佢地拎番轉面先影得 XD 響市集行下行下，我就一邊問人，一邊向著名嘅風之谷出發。呢座整面牆都係粉紅色嘅大樓，真係好大。但如果唔係問人，我真係唔知藏身響後巷滿布密密麻麻嘅大樓同商店之間，個入口到底係響邊。哈… 見到風之谷嘅少少喇！ 表面嘅一度牆，後面原來有好多通道同樓梯去唔同嘅樓層。一級一級行上去，除咗黎自世界各地嘅旅客，更加有黎自印度當地黎自唔同城市嘅印度當地人黎呢度參觀。唔同樓層望出去，都有唔同嘅景象。要影一張相得自己一個出現響相入面，真係同響泰姬陵一樣咁難。 風之谷嘅一角 ～ 風之谷嘅另一角 ～ 連風之谷入面都有嘅 ～ 七彩玻璃房 響風之谷裡面向外望，別有一番風格。 風之谷正面，好大呀！ 經過行咗好耐市集加埋響風之谷逗留咗好耐之後，真係好累呢。搵個地方舒舒服服咁晚餐一下，中場休息一陣之後，就要準備去買飛睇戲！因為，由我抵達印度當日，已經見到有套我好想睇嘅印度片嘅poster比我見到，知道佢準備上畫，而Jaipur呢度有當地非常出名嘅戲院，我當然要響當地感受一下bollywood電影啦！大部份嘅戲院都有得預售戲飛，但因為呢間戲院嘅出名，好多人都會專程黎呢間戲院睇戲嘅關係，呢間戲院，只有即場戲飛預售，希望盡量人人都有機會買到飛睇戲。大約早開場兩小時，我就黎到呢度排隊了。 好出名嘅Raj Mandir Cinema 好多人排隊，好彩早到，唔係真係連平民位都買唔到呀！ 套戲好多人睇，排咗好耐隊先有飛買，坐唔到豪華位，只有平民位，不過，好過無啦。響當地同當地人一齊睇bollywood電影有一個好好嘅回憶。主角一出場，在坐嘅觀眾除咗會歡呼，鼓掌，仲會吹口哨，好好笑，氣氛就好似現場見到對方咁。 呢度都係戲院 ＊0＊ 係等入坐前比你買零食嘅地方，我最頭以為自己入錯咗人地宴會嘅地方！ 好似Club嘅豪華戲院 ～ 三個小時嘅愛情電影，全印度語，無字幕，不過，靠住身體語言，演員表情同bollywood music，都可以感受得到故事係講咩同埋當中嘅高底起落，絕無悶場，睇到我都眼濕濕。同當地人睇戲，真係一個好好感受當地文化嘅體驗 ^^ 我偶像Shahrukh Khan ^o^ 影院入面裝修就同香港差唔多，不過當然唔及香港D梳化咁舒服啦。 睇完套戲都已經零晨一點了，要快快返飯店休息，明天一早出發！ fb: www.facebook.com/lifetoletgo blog: http://www.lifetoletgo.blogspot.hk
